ആസ്ത്മ മരുന്ന് കൊവിഡിനെ ചെറുക്കും, ആശുപത്രി വാസം കുറച്ചെന്ന് കണ്ടെത്തൽ; പഠനം

ന്യൂഡൽഹി: ആസ്ത്മ ചികിൽസയ്ക്ക് ഉപയോഗിക്കുന്ന ഒരു മരുന്ന് കൊവിഡ് 19ന് കാരണമാകുന്ന സാഴ്സ് കൊവ് 2 വൈറസ് മനുഷ്യ പ്രതിരോധ കോശങ്ങളിൽ പടരുന്നതിനെ തടയുമെന്ന് പഠനം. ആസ്ത്മ, ഹേ ഫീവർ, തൊലി ചുവന്നു തടിക്കുന്ന രോഗം എന്നിവ മൂലം ശരീരത്തിലുണ്ടാകുന്ന വീക്കം കുറയ്ക്കാൻ നൽകുന്ന മോണ്ടെലുകാസ്റ്റ് എന്ന മരുന്നാണ് കൊവിഡ് 19നെതിരെ ഫലപ്രദമാണെന്ന് കണ്ടെത്തിയത്. ബംഗളൂരുവിലെ ഇന്ത്യൻ ഇൻസ്റ്റിറ്റ്യൂട്ട് ഓഫ് സയൻസിലെ ഗവേഷകർ നടത്തിയ പഠനത്തിലാണ് ഈ കണ്ടെത്തൽ.

മോണ്ടെലുകാസ്റ്റ് പരീക്ഷിച്ച രോഗികളിൽ കൊവിഡ് മൂലമുള്ള ആശുപത്രിവാസം കുറഞ്ഞതായി റിപോർട്ടുകളുണ്ടെന്ന് ഗവേഷണത്തിന്റെ ഭാഗമായ ഐഐഎസ്‌സിയിലെ മോളിക്യുലാർ റീപ്രൊഡക്ഷൻ വിഭാഗത്തിലെ അസിസ്റ്റന്റ് പ്രൊഫസർ തൻവീർ ഹുസൈൻ പറഞ്ഞു. സാഴ്സ് കൊവ് 2 വൈറസ് മൂലമുണ്ടാകുന്ന അണുബാധയെ ചെറുക്കാൻ സഹായിക്കുന്ന ശക്തമായ ഇൻഹിബിറ്ററുകൾ രൂപകൽപന ചെയ്യുന്നതിനുള്ള ഒരു വഴികാട്ടിയാകുന്ന തന്മാത്രയായി മോണ്ടെലുകാസ്റ്റ് സോഡിയം ഹൈഡ്രേറ്റ് ഉപയോഗിക്കാൻ സാധിക്കുമെന്നാണ് പഠനത്തിൽ പറയുന്നത്. ഇ ലൈഫ് എന്ന ജേണലിലാണ് പഠനം പ്രസിദ്ധീകരിച്ചത്.