അമ്യൂസ്‌മെന്റ് പാര്‍ക്കിലെ റൈഡില്‍ നിന്ന് തെറിച്ചുവീണ് വിദ്യാര്‍ഥിനിക്ക് ഗുരുതര പരിക്ക്

പെരിന്തല്‍മണ്ണ: വെങ്ങാട് അമ്യൂസ് മെന്റ് പാര്‍ക്കിലെ റൈഡില്‍ നിന്നും തെറിച്ചു വീണ് സ്‌കൂളില്‍നിന്ന് വിനോദയാത്ര പോയ വിദ്യാര്‍ഥിനിക്ക് ഗുരുതര പരിക്കേറ്റു. വെട്ടത്തൂര്‍ എഎംയുപി സ്‌കൂള്‍ അഞ്ചാംതരം വിദ്യാര്‍ഥിനി കര്‍ക്കിടാംകുന്ന് മടത്തൊടി നജ്മുദ്ദീന്റെ മകള്‍ നിദ (10)യ്ക്കാണ് പരിക്കേറ്റത്. കഴിഞ്ഞ ദിവസം വെങ്ങാടുള്ള സ്വകാര്യ അമ്യൂസ് മെന്റ് പാര്‍ക്കില്‍ കറങ്ങുന്ന കുതിര റൈഡില്‍നിന്ന് തെറിച്ചുവീണാണ് അപകടം. ഞായറാഴ്ച ഉച്ചയ്ക്ക് 12.30നാണ് സംഭവം. അധ്യാപകര്‍ കുട്ടിയെ പെരിന്തല്‍മണ്ണ സ്വകാര്യ ആശുപത്രിയില്‍ പ്രവേശിപ്പിച്ചു. തലയ്ക്ക് പരിക്കേറ്റ കുട്ടിയെ അടിയന്തര ശസ്ത്രക്രിയക്ക് വിധേയമാക്കി തീവ്രപരിചരണ വിഭാഗത്തില്‍ ചികിത്സയിലാണ്. സംഭവത്തെത്തുടര്‍ന്ന് നാട്ടുകാര്‍ പാര്‍ക്കില്‍ കയറി റൈഡ് നിയന്ത്രിക്കുന്നവരുമായി ബഹളംവെച്ചു. കൊളത്തൂര്‍ പോലിസ് സ്ഥലത്തെത്തി അന്വേഷണം നടത്തിവരികയാണ്‌