ലോറി ഡ്രൈവര്‍മാരെ ലൈന്‍ ട്രാഫിക്ക് പഠിപ്പിക്കാന്‍ പ്രത്യേക പരിശീലന ക്ലാസ്

തിരുവനന്തപുരം: ദേശീയപാതാനിര്‍മാണം പൂര്‍ത്തിയാകുന്നതിനു മുന്നോടിയായി ലോറി ഡ്രൈവര്‍മാര്‍ക്ക് ലൈന്‍ ട്രാഫിക്കില്‍ പരിശീലനം നല്‍കാന്‍ മോട്ടോര്‍വാഹനവകുപ്പ് ഒരുങ്ങുന്നു. ഡ്രൈവര്‍ പരിശീലനകേന്ദ്രങ്ങളില്‍ ലോറി ഡ്രൈവര്‍മാക്കും കണ്ടെയിനര്‍ ഡ്രൈവര്‍മാര്‍ക്കുമായി പ്രത്യേക ക്ലാസ് സംഘടിപ്പിക്കും. ദേശീയപാതാനിര്‍മാണം പൂര്‍ത്തിയാകുന്നതോടെ വിഴിഞ്ഞം തുറമുഖത്തുനിന്ന് സംസ്ഥാനത്തിന്റെ വിവിധ പ്രദേശങ്ങളിലേക്ക് കണ്ടെയ്നര്‍ ഗതാഗതം വര്‍ധിക്കും. വലിയ വാഹനങ്ങള്‍ കുറഞ്ഞ വേഗത്തില്‍ സ്പീഡ് ട്രാക്കില്‍ പോകുന്നതും സിഗ്‌നല്‍ നല്‍കാതെ ലൈന്‍ മാറ്റുന്നതും അപകടത്തിനിടയാക്കും. പുതിയ തലമുറ ആറുവരി ദേശീയപാതകളിലെ അപകടങ്ങള്‍ക്കുള്ള പ്രധാന കാരണങ്ങളിലൊന്ന് ലൈന്‍ ട്രാഫിക്കിലെ പിഴവാണ്. പാര്‍ക്കിങ്ങിലും സുരക്ഷാനിബന്ധനകള്‍ പാലിക്കേണ്ടതുണ്ട്.നിലവിലെ ഡ്രൈവര്‍മാര്‍ക്ക് ഇത്തരം സങ്കേതങ്ങളില്‍ പരിചയക്കുറവുണ്ടെന്നാണ് നിഗമനം. പെട്രോള്‍, ഡീസല്‍ തുടങ്ങിയ ഇന്ധനങ്ങളും, രാസമിശ്രിതങ്ങളും കൊണ്ടുപോകുന്ന ഡ്രൈവര്‍മാര്‍ക്ക് സുരക്ഷാകോഴ്സ് നിര്‍ബന്ധമാണെങ്കിലും കണ്ടെയ്നര്‍ ഡ്രൈവര്‍മാര്‍ക്ക് പരിശീലന സംവിധാനങ്ങളൊന്നുമില്ല. ഇതിനു പുറമേ ആംബുലന്‍സ് ഡ്രൈവര്‍മാര്‍ക്ക് പ്രഥമശുശ്രൂഷയില്‍ പരിശീലനം നല്‍കാനും പദ്ധതിയുണ്ട്.