ആറംഗ കുടുംബം ദുരൂഹസാഹചര്യത്തില്‍ മരിച്ചു; മൃതദേഹങ്ങള്‍ പുതപ്പിട്ടു മൂടിയ നിലയില്‍

ഭുവനേശ്വര്‍: ഒഡീഷയിലെ ബൊളാംഗീര്‍ ജില്ലയിലെ ഒരു വീട്ടില്‍ ആറംഗ കുടുംബത്തെ ദുരൂഹസാഹചര്യത്തില്‍ മരിച്ച നിലയില്‍ കണ്ടെത്തി. ഇവരുടെ മൃതദേഹങ്ങള്‍ തറയില്‍ പുതപ്പ് കൊണ്ട് പൊതിഞ്ഞ നിലയിലാണു കണ്ടെത്തിയത്. മൃതദേഹങ്ങള്‍ പോസ്റ്റ്മോര്‍ട്ടത്തിനയച്ചു. ബൊളാംഗീര്‍ ജില്ലയിലെ പട്നാഗര്‍ പോലിസ് സ്റ്റേഷന്‍ പരിധിയിലെ സന്‍രപദ ഗ്രാമത്തിലെ വീട്ടിലാണ് മൃതദേഹങ്ങള്‍ കണ്ടെത്തിയത്. ബുലു ജാനി(50), ഭാര്യ ജ്യോതി(48), രണ്ട് പെണ്‍മക്കളായ സരിത, ശ്രേയ, രണ്ട് ആണ്‍മക്കളായ ഭീഷ്മ, സഞ്ജീവ് എന്നിവരാണ് മരിച്ചത്. ഇവരുടെ വീടിന്റെ വാതില്‍ അടഞ്ഞുകിടക്കുന്നത് അയല്‍ക്കാര്‍ കണ്ടെത്തിയതിനെ തുടര്‍ന്നാണ് സംഭവം പുറത്തുവന്നത്. അയല്‍വാസികള്‍ ജനലിലൂടെ നോക്കിയപ്പോഴാണ് ആറ് മൃതദേഹങ്ങള്‍ കണ്ടെത്തിയത്. ബുലു ജാനിയും കുടുംബവും വീടിന്റെ തറയില്‍ കിടക്കുന്നതായാണു കണ്ടത്. മൃതദേഹങ്ങളെല്ലാം പുതപ്പ് കൊണ്ട് പൊതിഞ്ഞിരുന്നു. ഉടന്‍ അയല്‍വാസികള്‍ പോലിസിനെ അറിയിച്ചു. പോലിസും ഫോറന്‍സിക് സംഘവും സ്ഥലത്തെത്തി. മരണത്തിന് പിന്നിലെ കാരണം കണ്ടെത്താന്‍ കൂടുതല്‍ അന്വേഷണം നടക്കുന്നുണ്ട്.

കഴിഞ്ഞ 10 വര്‍ഷമായി ബുലു ജാനിയുടെ കുടുംബം ഗ്രാമത്തിലും സമീപ പ്രദേശങ്ങളിലും തേന്‍ ശേഖരിച്ച് വില്‍ക്കുകയായിരുന്നുവെന്ന് പ്രദേശവാസികള്‍ പറഞ്ഞു. സംഭവത്തെ കുറിച്ച് അന്വേഷിക്കാന്‍ പ്രത്യേക സംഘത്തെ നിയോഗിച്ചിട്ടുണ്ടെന്നും എഎസ്പി ടീമിനെ നയിക്കുമെന്നും ബൊളാംഗീര്‍ എസ്പി സന്ദീപ് സമ്പത്ത് പറഞ്ഞു. മൃതദേഹങ്ങളില്‍ മൂര്‍ച്ചയുള്ള ആയുധങ്ങളില്‍ നിന്ന് പരിക്കേറ്റ അടയാളങ്ങള്‍ കണ്ടെത്തിയിട്ടുണ്ട്. പ്രാഥമികാന്വേഷണത്തില്‍ ഇത് കൊലപാതക കേസാണെന്ന് സംശയിക്കുന്നതായും എല്ലാവിധത്തിലും അന്വേഷിക്കുന്നുണ്ടെന്നും സമ്പത്ത് പറഞ്ഞു.

Six members of family found dead, bodies wrapped in blanket at home in Odisha's Bolangir