സൗദി വിദേശകാര്യ മന്ത്രി തിങ്കളാഴ്ച ഇന്ത്യ സന്ദര്‍ശിക്കും

ന്യൂഡല്‍ഹി: സൗദി വിദേശകാര്യമന്ത്രി ആദില്‍ അല്‍ ജുബൈര്‍ തിങ്കളാഴ്ച ഇന്ത്യ സന്ദര്‍ശിക്കുമെന്ന് വിദേശകാര്യ വക്താവ് രവീഷ് കുമാര്‍. ന്യൂഡല്‍ഹിയില്‍ നടത്തിയ വാര്‍ത്താസമ്മേളനത്തിലാണ് രവീഷ് ഇക്കാര്യം അറിയിച്ചത്.

വിദേശകാര്യ മന്ത്രി സുഷമാ സ്വരാജുമായി ആദില്‍ കൂടിക്കാഴ്ച നടത്തും. സൗദി കിരീടാവകാശി മുഹമ്മദ് ബിന്‍ സല്‍മാന്റെ കഴിഞ്ഞ മാസത്തെ സന്ദര്‍ശനത്തിന്റെ തുടര്‍ച്ചയായിട്ടായിരിക്കും ആദിലിന്റെ സന്ദര്‍ശനമെന്ന് രവീഷ് പറഞ്ഞു.

ആദില്‍ ഇന്ത്യാ-പാക് സംഘര്‍ഷങ്ങളില്‍ മധ്യസ്ഥത വഹിക്കുമെന്ന അഭ്യൂഹങ്ങള്‍ അദ്ദേഹം നിഷേധിച്ചു. ഒരു രാജ്യവും മധ്യസ്ഥ ശ്രമങ്ങളുമായി മുന്നോട്ട് വന്നിട്ടില്ലെന്നും രാജ്യത്തിന് ഒരു മധ്യസ്ഥ ശ്രമവും ആവശ്യമില്ലെന്നും തങ്ങളും നിലപാട് വ്യക്തമാണെന്നും അദ്ദേഹം പറഞ്ഞു. പാകിസ്താന്‍ സന്ദര്‍ശിച്ച് മൂന്നു ദിവസത്തിനു ശേഷമാണ് ആദില്‍ ഇന്ത്യ സന്ദര്‍ശിക്കാനെത്തുന്നത്.