ഗുരുവായൂര്‍ അമ്പലത്തില്‍ റീല്‍സ് ചിത്രീകരിച്ച രാജീവ് ചന്ദ്രശേഖറിനെതിരെ പരാതി

തൃശ്ശൂര്‍: ഗുരുവായൂര്‍ അമ്പലത്തില്‍ റീല്‍സ് ചിത്രീകരിച്ച ബിജെപി സംസ്ഥാന അധ്യക്ഷന്‍ രാജിവ് ചന്ദ്രശേഖര്‍ക്കെതിരേ കോണ്‍ഗ്രസ് പോലിസില്‍ പരാതി നല്‍കി. കോണ്‍ഗ്രസ് നേതാവ് വി ആര്‍ അനൂപാണ് ഗുരുവായൂര്‍ ടെമ്പിള്‍ പോലിസില്‍ പരാതി നല്‍കിയിരിക്കുന്നത്. അമ്പലത്തില്‍ റീല്‍സ് ചിത്രീകരണം പാടില്ലെന്ന ഹൈക്കോടതി വിധി ലംഘിച്ചെന്ന് പരാതിയില്‍ പറയുന്നു.

അമ്പലത്തില്‍ വീഡിയോ ചിത്രീകരിക്കുന്നതിന് നിയന്ത്രണമുള്ളിടത്ത് താനും ഒപ്പമുള്ളവരും നടന്നുനീങ്ങുന്ന ദൃശ്യം രാജീവ് ചന്ദ്രശേഖര്‍ തന്നെയാണ് സാമൂഹികമാധ്യമത്തില്‍ പങ്കുവെച്ചത്. വീഡിയോ പോസ്റ്റ് ചെയ്തതിന് പിന്നാലെയാണ് സംഭവം വിവാദമായത്.

അമ്പലത്തിന്റെ ഒരു നടപ്പന്തലിലും, പ്രത്യേകിച്ച് കിഴക്ക്, തെക്ക് നടപ്പന്തലുകളില്‍ വീഡിയോ ചിത്രീകരണം പാടില്ല എന്ന ഹൈക്കോടതിയുടെ ഉത്തരവ് നിലവിലുണ്ട്. മാധ്യമങ്ങള്‍ക്കുള്‍പ്പെടെ വിലക്കുള്ള മേഖലയാണിത്. കുറച്ചുനാള്‍ മുന്‍പ് കോഴിക്കോട് സ്വദേശിയായ കൃഷ്ണ ഭക്തയായ ജസ്‌ന എന്ന യുവതിയുമായി ബന്ധപ്പെട്ടുണ്ടായ റീല്‍സ് വിവാദത്തെ തുടര്‍ന്നാണ് ഹൈക്കോടതിയുടെ ഭാഗത്തുനിന്ന് ഇത്തരമൊരു നടപടിയുണ്ടായത്. അന്ന് ജസ്‌ക്കെതിരേ പോലിസ് കലാപാഹ്വാനത്തിന് കേസെടുക്കുകയും ചെയ്തിരുന്നു. ക്ഷേത്രത്തിലെത്തുന്ന വിവാഹപ്പാര്‍ട്ടികള്‍ക്കു മാത്രമാണ് കര്‍ശന ഉപാധികളോടെ വീഡിയോ ചിത്രീകരിക്കാന്‍ അനുമതിയുള്ളത്.