ബിന്ദു അമ്മിണിയെ ആക്രമിച്ച മോഹൻദാസ് ആർഎസ്എസ് മുൻ മുഖ്യ ശിക്ഷക്

കോ​ഴി​ക്കോ​ട്​: ആ​ക്ടി​വി​സ്റ്റും കോ​ഴി​ക്കോ​ട്​ ഗ​വ. ലോ ​കോ​ള​ജ്​ ഗസ്റ്റ്​ അ​ധ്യാ​പി​ക​യു​മാ​യ ബി​ന്ദു അ​മ്മി​ണി​യെ ന​ടു​റോ​ഡി​ൽ ആ​ക്ര​മി​ച്ച കേ​സി​ൽ അ​റ​സ്റ്റി​ലായ മോഹൻദാസ് ആർഎസ്എസ് മുൻ മുഖ്യ ശിക്ഷക്. ​ബേ​പ്പൂ​ർ സ്വ​ദേ​ശി​യും വെ​ള്ള​യി​ൽ തൊ​ടി​യി​ൽ പ്ര​ദേ​ശ​ത്ത്​ താ​മ​സ​ക്കാ​ര​നു​മാ​യ മോ​ഹ​ൻ​ദാ​സി​നെ​ വ്യാഴാഴ്ച്ചയാണ് പോലിസ് അറസ്റ്റ് ചെയ്തത്.

കോ​ഴി​ക്കോ​ട്​ ബീ​ച്ചി​ൽ​ ബു​ധ​നാ​ഴ്ച വൈ​കീ​ട്ടാ​ണ്​ ബി​ന്ദു​വി​നെ ആ​ക്ര​മി​ച്ച​ത്. പ്ര​തി മോ​ഹ​ൻ​ദാ​സ് സ​ജീ​വ ആ​ർഎ​സ്എ​സ് പ്ര​വ​ർ​ത്ത​ക​നാ​ണ്. മു​ൻ മു​ഖ്യ ശി​ക്ഷ​കാ​ണ്. ക​ഴി​ഞ്ഞ​യാ​ഴ്ച്ച വെ​ള്ള​യി​ലു​ണ്ടാ​യ സിപിഎം-ആ​ർഎ​സ്എ​സ് സം​ഘ​ർ​ഷ​ത്തി​ൽ ഇ​യാ​ളു​ണ്ടാ​യി​രു​ന്നു.

പ്ര​തി മ​ദ്യ​പി​ച്ചി​ട്ടു​ണ്ടോ എ​ന്ന​റി​യാ​ൻ പ​രി​ശോ​ധ​ന​ക്കു​പോ​ലും ബു​ധ​നാ​ഴ്ച വെ​ള്ള​യി​ൽ പോലി​സ്​ ത​യാ​റാ​യി​ല്ലെ​ന്ന ആ​​ക്ഷേ​പ​മു​ണ്ട്. ​മോഹൻദാസിനെതി​രേ മൂ​ന്നു വ​കു​​പ്പു​ക​ളാ​ണ്​ ചു​മ​ത്തി​യ​ത്. അ​ടി​പി​ടി, സ്​​​ത്രീ​ക​ളെ അ​ധി​ക്ഷേ​പി​ക്ക​ൽ, ക്രി​മി​ന​ൽ ഉ​ദ്ദേ​ശ്യ​​ത്തോ​ടെ സ്ത്രീ​ക​ൾ​ക്കു​നേരെയു​ള്ള കൈ​യേ​റ്റം ചെ​യ്യ​ൽ തു​ട​ങ്ങി​യ വ​കു​പ്പു​ക​ളാ​ണ്​ ചു​മ​ത്തി​യ​ത്. പ്ര​തി​ഷേ​ധ​മു​യ​ർ​ന്ന​തി​നെ തു​ട​ർ​ന്നാ​ണ്​ സ്ത്രീ​ക​ളെ ക്രി​മി​ന​ൽ ഉദ്ദേശ്യത്തോടെ കൈ​യേ​റ്റം ചെ​യ്യ​ൽ എ​ന്ന വ​കു​പ്പ്​ ചേ​ർ​ക്കാ​ൻ പോലിസ്​ ത​യാ​റാ​യ​ത്.

വ്യാ​ഴാ​ഴ്ച രാ​വി​ലെ ഉ​ന്ന​ത വി​ദ്യാ​ഭ്യാ​സ മ​ന്ത്രി ആ​ർ ബി​ന്ദു​വ​ട​ക്കം പ്ര​മു​ഖ​ർ ആ​ക്ര​മ​ണ​ത്തി​നെ​തി​രേ ഫേ​സ്​​ബു​ക്ക്​ കു​റി​പ്പി​ലൂ​ടെ രം​ഗ​ത്തെ​ത്തി​യി​രു​ന്നു. വ​നി​ത ക​മീ​ഷ​ൻ അ​ധ്യ​ക്ഷ പി ​സ​തീ​ദേ​വി​യും വി​വി​ധ സാ​മൂ​ഹി​ക പ്ര​വ​ർ​ത്ത​ക​രും വി​ഷ​യ​ത്തി​ലി​ട​പെ​ട്ടി​രു​ന്നു. തു​ട​ർ​ന്നാ​ണ്​ പൊ​ലീ​സ്​​ ഉ​ണ​ർ​ന്നു​പ്ര​വ​ർ​ത്തി​ക്കാ​ൻ ​ ത​യാ​റാ​യ​ത്. ആ​ക്ര​മ​ണ​മു​ണ്ടാ​കു​ന്ന​തി​നു​ മു​മ്പ്​ ചി​ല​ർ ത​ന്നെ പി​ന്തു​ട​രു​ക​യും ബി​ന്ദു അ​മ്മി​ണി​യ​ല്ലേ എ​ന്ന്​ ചോ​ദി​ക്കു​ക​യും 'ന​മ്മു​ടെ സ്വ​ന്തം ചേ​ച്ചി​യാ​ണെ​ന്ന്​' ക​ളി​യാ​ക്കു​ക​യും ചെ​യ്ത​താ​യി ബി​ന്ദു പ​റ​ഞ്ഞിരുന്നു.