സംഘപരിവാറിന്റെ അതേപണിയാണ് സിപിഎം ചെയ്യുന്നത്: വി ഡി സതീശന്‍

കുമ്പള: വര്‍ഗീയ ധ്രുവീകരണമുണ്ടാക്കുക എന്ന സംഘപരിവാറിന്റെ അതേ പണിയാണ് കേരളത്തില്‍ സിപിഎം പയറ്റുന്നതെന്ന് പ്രതിപക്ഷ നേതാവ് വി ഡി സതീശന്‍. കാസര്‍കോട് കുമ്പളയില്‍ 'പുതുയുഗ യാത്ര'യില്‍ സംസാരിക്കുകയായിരുന്നു അദ്ദേഹം. യുഡിഎഫ് ആണ് യഥാര്‍ത്ഥ ഇടതുപക്ഷം, എല്‍ഡിഎഫ് തീവ്രവലതുപക്ഷമായി മാറിയിരിക്കുകയാണ്. മാറ്റങ്ങളുടെ കൂടെ നില്‍ക്കുന്ന നെഹ്റൂവിയന്‍ ലെഫ്റ്റ് ആണ് നമ്മള്‍. വര്‍ഗീയതയെ കേരളത്തിന്റെ മണ്ണില്‍ കുഴിച്ചുമൂടണം. തീപ്പൊരി വീണാല്‍ ആളി കത്തിക്കാന്‍ ശ്രമിക്കുന്നവര്‍ക്ക് തീപ്പന്തം എറിഞ്ഞ് കൊടുക്കുകയാണ് സിപിഎം. തിരഞ്ഞെടുപ്പ് കാലത്ത് വര്‍ഗീയത പറഞ്ഞാലും അതിനെ യുഡിഎഫ് ചോദ്യം ചെയ്യും.

അടുത്ത നിയമസഭാ തെരഞ്ഞെടുപ്പില്‍ ടീം യുഡിഎഫ് നൂറിലധികം സീറ്റുകള്‍ നേടി അധികാരത്തിലേക്ക് തിരിച്ചുവരുമെന്നും അദ്ദേഹം പറഞ്ഞു. എവിടെയെല്ലാം ഈ സര്‍ക്കാര്‍ പരാജയപ്പെട്ടോ അവിടെയെല്ലാം ടീം യുഡിഎഫ് എന്ത് ചെയ്യുമെന്ന് ജനങ്ങളോട് പറയും. വെന്റിലേറ്ററിലായ ആരോഗ്യമേഖലയെ യുഡിഎഫ് വരുമ്പോള്‍ കൈപിടിച്ചുയര്‍ത്തും. എല്ലാ മേഖലയും മാറും. ലോകം മാറുമ്പോള്‍ കേരളവും മാറുമെന്നും വി ഡി സതീശന്‍ പറഞ്ഞു.

നല്ല കമ്മ്യൂണിസ്റ്റുകാരെ കാണുമ്പോള്‍ ചിരിച്ചോളാന്‍ കഴിഞ്ഞ തെരഞ്ഞെടുപ്പിന് മുമ്പ് താന്‍ പറഞ്ഞു. അവര്‍ നമുക്കാണ് വോട്ട് ചെയ്യാന്‍ പോകുന്നത്. നല്ല ഇടതുപക്ഷ സഹയാത്രികരെ കാണുമ്പോള്‍ ചേര്‍ത്തുപിടിച്ചോളൂ. ഈ സര്‍ക്കാരിനെ അധികാരത്തിന്റെ ഗോപുരത്തില്‍ നിന്നും ഇറക്കാന്‍ നമ്മളേക്കാള്‍ ആഗ്രഹിക്കുകയാണ് അവര്‍.