കൂടുതല്‍ ബോഗികള്‍ കത്തിക്കാന്‍ ലക്ഷ്യമിട്ടെന്ന് കണ്ണൂര്‍ ട്രെയിന്‍ തീവയ്പ് കേസ് പ്രതിയുടെ മൊഴി

കണ്ണൂര്‍: കണ്ണൂരില്‍ നിര്‍ത്തിയിട്ട ട്രെയിന്‍ തീയിട്ട കേസില്‍ അറസ്റ്റിലായ പ്രതിയുടെ മൊഴി പുറത്ത്. ആലപ്പുഴ എക്‌സിക്യൂട്ടീവ് എക്‌സ്പ്രസിന്റെ കൂടുതല്‍ ബോഗികള്‍ കത്തിക്കാന്‍ ലക്ഷ്യമിട്ടെന്നാണ് പ്രതി പ്രസൂണ്‍ ജിത് സിക്ദര്‍ പോലിസിനോട് പറഞ്ഞത്. ട്രെയിനിന്റെ 19ാം കോച്ചും സമാനമായി കത്തിക്കാന്‍ ശ്രമിച്ചിരുന്നുവെന്നും അതിനായി പ്ലാസ്റ്റിക് കുപ്പി കത്തിച്ച് ഈ സീറ്റിലേക്ക് എറിഞ്ഞിരുന്നുവെന്നും പ്രതി മൊഴി നല്‍കി. എന്നാല്‍ തീ പടര്‍ന്നില്ല. ട്രെയിനിന്റെ 17ാമത്തെ കോച്ച് കത്തിച്ചത് ഷൂസിന് തീകൊളുത്തിയാണെന്നും ഇയാളുടെ മൊഴിയിലുണ്ട്. നിലവില്‍ പോലിസ് കസ്റ്റഡിയിലാണ് പ്രതി. പ്രതിയെ ഇന്നലെ രാവിലെയാണ് കോടതി പോലിസ് കസ്റ്റഡിയില്‍ വിട്ടത്. പിന്നാലെ പ്രതിയെ അന്വേഷണ സംഘം തെളിവെടുപ്പിന് കണ്ണൂര്‍ റെയില്‍വേ സ്‌റ്റേഷനില്‍ എത്തിച്ചിരുന്നു. ബോഗിക്കുള്ളില്‍ എത്തിച്ച ശേഷം പ്രതി എങ്ങനെയാണ് തീവച്ചതെന്ന കാര്യം അന്വേഷണ സംഘത്തോട് വിശദീകരിച്ചു.