ഹോര്‍മുസ് സ്വതന്ത്രമാകണമെന്ന് ഇന്ത്യ; ഫ്രാന്‍സുമായി ചര്‍ച്ച ചെയ്തു

ന്യൂഡല്‍ഹി: ഹോര്‍മുസ് കടലിടുക്ക് പൂര്‍ണ്ണമായും സ്വതന്ത്രമാകണം എന്ന് ഇന്ത്യ. കടലിടുക്കിലെ പഴയ സ്ഥിതി പുനസ്ഥാപിക്കുന്നത് സംബന്ധിച്ച് ഇന്ത്യയും ഫ്രാന്‍സും ചര്‍ച്ച ചെയ്തു. അതേസമയം, ജിസിസിയില്‍ നിന്നുള്ള ഇന്ത്യന്‍ കപ്പലുകള്‍ക്ക് ഉപരോധം ഏര്‍പ്പെടുത്തില്ലെന്ന് യുഎസ് വ്യക്തമാക്കി. ഇന്ത്യന്‍ കപ്പലുകളില്‍ നിന്ന് ടോള്‍ ഈടാക്കിയിട്ടില്ലെന്ന് ഇറാനും അറിയിച്ചു. ഇന്ത്യയില്‍ നിന്ന് 20000 കിലോ മരുന്ന് കൂടി ഇറാന്‍ എംബസി അയച്ചു.

ഇറാനുമേല്‍ അമേരിക്ക സമുദ്ര ഉപരോധം തുടങ്ങി. ഇറാന്റെ തുറമുഖങ്ങളിലേക്കും തിരിച്ചുമുള്ള എല്ലാ കപ്പലുകളും തടയുമെന്നാണ് ട്രംപിന്റെ പ്രഖ്യാപനം. ഇറാനിയന്‍ തുറമുഖങ്ങള്‍ക്ക് ഭീഷണിയുണ്ടായാല്‍ ഗള്‍ഫിലെ ഒരു തുറമുഖവും സുരക്ഷിതമായിരിക്കില്ല എന്ന് ഇറാനിയന്‍ സൈനിക വക്താവ് പ്രതികരിച്ചു. യുദ്ധം അവസാനിപ്പിക്കുന്നതിനുള്ള അമേരിക്കന്‍ വ്യവസ്ഥകള്‍ അംഗീകരിക്കാന്‍ ഇറാനുമേല്‍ സമ്മര്‍ദ്ദം ശക്തമാക്കുന്നതിന്റെ ഭാഗമായാണ് അമേരിക്കന്‍ ഉപരോധം.

അതേസമയം, ലിയോ മാര്‍പാപ്പക്കെതിരെ നടത്തിയ കടുത്ത പരാമര്‍ശങ്ങളില്‍ താന്‍ മാപ്പ് പറയില്ലെന്ന് യുഎസ് പ്രസിഡന്റ് ഡോണള്‍ഡ് ട്രംപ്. ഇറാന്‍ യുദ്ധത്തിനെതിരെ സംസാരിച്ച മാര്‍പാപ്പയാണ് തെറ്റു ചെയ്തതെന്നും ട്രംപ് അഭിപ്രായപ്പെട്ടു. ട്രംപിന്റെ പരാമര്‍ശങ്ങള്‍ക്കെതിരെ വലിയ പ്രതിഷേധം ഉയര്‍ന്ന സാഹചര്യത്തിലാണ് പ്രതികരണം.