തൃണമൂല്‍ കോണ്‍ഗ്രസ് നേതാവ് അഭിഷേക് ബാനര്‍ജിക്ക് ഇഡി നോട്ടിസ്

ന്യൂഡല്‍ഹി:തൃണമൂല്‍ കോണ്‍ഗ്രസ് ജനറല്‍ സെക്രട്ടറി അഭിഷേക് ബാനര്‍ജിക്ക് ഇഡി നോട്ടിസ്.പശ്ചിമബംഗാളില്‍ കല്‍ക്കരി അഴിമതിയുമായി ബന്ധപ്പെട്ട കള്ളപ്പണം വെളുപ്പിക്കല്‍ കേസിലാണ് ഇഡി നോട്ടിസ്. സെപ്റ്റംബര്‍ 2ന് ഇഡിക്ക് മുന്നില്‍ ഹാജരാകാന്‍ ആവശ്യപ്പെട്ടാണ് നോട്ടിസ്.

പശ്ചിമ ബംഗാള്‍ മുഖ്യമന്ത്രിയും ടിഎംസി അധ്യക്ഷയ മമത ബാനര്‍ജിയുടെ അനന്തരവന്‍ കൂടിയാണ് അഭിഷേക് ബാനര്‍ജി.പശ്ചിമ ബംഗാളിലെ കുനുസ്‌റ്റോറിയ, കജോറ പ്രദേശങ്ങളിലെ ഈസ്‌റ്റേണ്‍ കോള്‍ഫീല്‍ഡ്‌സ് ലിമിറ്റഡ് ഖനികളുമായി ബന്ധപ്പെട്ട കോടിക്കണക്കിന് രൂപയുടെ കല്‍ക്കരി അഴിമതിയുമായി ബന്ധപ്പെട്ട് 2020 നവംബറില്‍ സിബിഐ എഫ്‌ഐആര്‍ രജിസ്റ്റര്‍ ചെയ്തതിന് പിന്നാലെയാണ് ഇഡി ഇക്കാര്യത്തില്‍ അന്വേഷണം ആരംഭിച്ചത്. ഈ അനധികൃത കച്ചവടത്തില്‍ നിന്ന് ലഭിച്ച ഫണ്ടിന്റെ ഗുണഭോക്താവാണ് ടിഎംസി എംപിയെന്ന് അന്വേഷണ ഏജന്‍സിയുടെ വാദം.