അപകീര്‍ത്തികരമായ പരാമര്‍ശം; പി സി ജോര്‍ജിനെതിരേ തിരഞ്ഞെടുപ്പ് കമീഷന് പരാതി
കോട്ടയം: പൊതുവേദിയില്‍ അപകീര്‍ത്തികരമായ പരാമര്‍ശം നടത്തിയെന്ന് ആരോപിച്ച് പൂഞ്ഞാറിലെ ജനപക്ഷം സെക്കുലര്‍ സ്ഥാനാര്‍ഥി പി സി ജോര്‍ജിനെതിരേ എല്‍ഡിഎഫ് സ്ഥാനാര്‍ഥി അഡ്വ. സെബാസ്റ്റിയന്‍ കുളത്തുങ്കല്‍ തിരഞ്ഞെടുപ്പ് കമ്മിഷന് പരാതി നല്‍കി. കഴിഞ്ഞ ദിവസം കാഞ്ഞിരപ്പള്ളി പാറത്തോട് നടന്ന യോഗത്തില്‍ പി സി ജോര്‍ജ്, സെബാസ്റ്റിയന്‍ കുളത്തുങ്കലിനെ പലിശക്കാരനെന്ന് വിളിക്കുകയും ഇദ്ദേഹത്തെ ഇടവകയില്‍നിന്ന് ഇറക്കിവിട്ടതായി ആക്ഷേപിക്കുകയും ചെയ്‌തെന്നാണ് പരാതിയില്‍ പറയുന്നത്. എന്നാല്‍, കൂവപ്പള്ളി സര്‍വീസ് സഹകരണ ബാങ്ക് അധ്യക്ഷന്‍ എന്നതിലുപരി ഒരുവിധ പണമിടപാടും താന്‍ നടത്തുന്നില്ലെന്ന് സെബാസ്റ്റിയന്‍ കുളത്തുങ്കല്‍ പറഞ്ഞു. പാരമ്പര്യമായി നിയമവിധേയമായി ചിട്ടി ബിസിനസ് തന്റെ കുടുംബം നടത്തുന്നുണ്ട്. ഈ സ്ഥാപനത്തിലും നേരിട്ട് പങ്കാളിത്തമോ അധികാരമോ ഇല്ല. തിരഞ്ഞെടുപ്പ് പ്രചാരണപ്രവര്‍ത്തനങ്ങളുടെ ഭാഗമായി അനുഗ്രഹം തേടി പള്ളിയിലെത്തിയ തന്നെ വികാരി ജെയിംസ് തെക്കുംചേരിക്കുന്നേല്‍ ഇറക്കിവിട്ടെന്ന ആരോപണവും തെറ്റാണ്. ഇത് മതസ്പര്‍ധ വളര്‍ത്താന്‍ വേണ്ടിയുള്ള ശ്രമമാണെന്നും വൈദികന്‍ ഇരുകൈയും നീട്ടി സ്വീകരിക്കുകയായിരുന്നെന്നും പരാതിയില്‍ ചൂണ്ടിക്കാട്ടിയിട്ടുണ്ട്.
Defamatory remarks; Complaint against PC George
