ഫ്രഷ് കട്ടിന് സമീപം നിരോധനാജ്ഞ പ്രഖ്യാപിച്ചു

കോഴിക്കോട്: താമരശേരി അമ്പായത്തോടിലെ ഫ്രഷ് കട്ട് അറവ് മാലിന്യ സംസ്‌കരണ പ്ലാന്റിന് സമീപം നിരോധനാജ്ഞ പ്രഖ്യാപിച്ചു. ഏഴു ദിവസത്തേക്കാണ് ഉത്തരവ്. സംഘര്‍ഷാവസ്ഥ കണക്കിലെടുത്താണ് നടപടി. അതേസമയം, പ്ലാന്റ് തുറക്കില്ലെന്ന് കമ്പനി പ്രഖ്യാപിച്ചതോടെ സമരം താല്‍ക്കാലികമായി മാറ്റിവയ്ക്കാന്‍ സമരസമിതി തീരുമാനിച്ചു. കമ്പനി തുറക്കുന്ന സമയം മുതല്‍ സമരം തുടരുമെന്നാണ് പ്രഖ്യാപനം.

മലിനീകരണ നിയന്ത്രണബോര്‍ഡിന്റേയും ശുചിത്വ മിഷന്റേയും റിപ്പോര്‍ട്ടിന്റെയും അടിസ്ഥാനത്തിലാണ് ഫ്രഷ് കട്ട് തുറക്കാമെന്ന് ജില്ലാഭരണകൂടം നിര്‍ദേശിച്ചത്. പ്രതിദിനം സംസ്‌കരിക്കുന്ന മാലിന്യത്തിന്റെ അളവ് 25 ടണില്‍നിന്നു 20 ടണ്ണായി കുറക്കാന്‍ പ്ലാന്റ് ഉടമകള്‍ക്ക് നിര്‍ദേശം നല്‍കിയിട്ടുണ്ട്. അതിനിടെ സമരത്തെ തുടര്‍ന്നുണ്ടായ സംഘര്‍ഷവുമായി ബന്ധപ്പെട്ട് രാത്രിയില്‍ വീട് കയറിയുള്ള പരിശോധന ഒഴിവാക്കുമെന്ന് സര്‍വകക്ഷി യോഗത്തില്‍ പോലീസിന്റെ ഉറപ്പ് നല്‍കി.