യുവതികള്‍ ശബരിമലയില്‍ എത്തിയ കാര്യം മുഖ്യമന്ത്രി സ്ഥിരീകരിച്ചു

തിരുവനന്തപുരം: ശബരിമലയില്‍ യുവതികള്‍ ദര്‍ശനം നടത്തിയെന്ന കാര്യം മുഖ്യമന്ത്രി പിണറായി വിജയന്‍ സ്ഥിരീകരിച്ചു. അവര്‍ക്ക് പോലിസ് സംരക്ഷണം നല്‍കിയതായും അദ്ദേഹം പറഞ്ഞു. പെരിന്തല്‍മണ്ണ സ്വദേശിയായ കനക ദുര്‍ഗയും കൊയിലാണ്ടി സ്വദേശിയായ ബിന്ദുവുമാണ് ഇന്ന് പുലര്‍ച്ചെ ശബരിമലയിലെത്തി ദര്‍ശനം നടത്തിയത്. ഇതിന്റെ വീഡിയോ ദൃശ്യങ്ങള്‍ പുറത്തുവന്നിട്ടുണ്ട്. കയറുന്ന ആളുകള്‍ക്ക് പോലിസ് സംരക്ഷണം നല്‍കുമെന്ന് നേരത്തേ സര്‍ക്കാര്‍ പ്രഖ്യാപിച്ചിട്ടുള്ളതാണെന്നും മുഖ്യമന്ത്രി അറിയിച്ചു.

യുവതികളെ സന്നിധാനത്ത് കൊണ്ടുവരിക എന്നത് സര്‍ക്കാരിന്റെ നിലപാടല്ലെന്നും എന്നാല്‍, സുപ്രിം കോടതി വിധി പ്രകാരം യുവതികള്‍ എത്തിയാല്‍ പോലിസ് സംരക്ഷണം നല്‍കുമെന്നും മന്ത്രി എ കെ ബാലന്‍ വ്യക്തമാക്കി.