ശ്രീരാമനെ ഇറക്കി തിരഞ്ഞെടുപ്പ് ജയിക്കാന്‍ ബിജെപി; ദൂരദര്‍ശനില്‍ രാമായണം വീണ്ടും സംപ്രേക്ഷണം ചെയ്യും

ന്യൂഡല്‍ഹി: ലോക്‌സഭാ തിരഞ്ഞെടുപ്പ് അടുത്തിരിക്കുന്ന സാഹചര്യത്തില്‍ ബിജെപിയുടെ നേതൃത്വത്തിലുള്ള കേന്ദ്ര സര്‍ക്കാര്‍ അയോദ്ധ്യ ക്ഷേത്രവും രാമായണവും ഉയര്‍ത്തിക്കാട്ടി വോട്ട് നേടാനുള്ള ശ്രമം തുടരുന്നു. ഇതിന് ഇതിന് ദൂരദര്‍ശനെ കൂട്ടുപിടിക്കുകയാണ്. തിരഞ്ഞെടുപ്പ് അടുത്തിരിക്കെ രാമാനന്ദ സാഗറിന്റെ രാമായണം പരമ്പര വീണ്ടും ദൂരദര്‍ശന്‍ സംപ്രേക്ഷണം ചെയ്യും. 1990കളില്‍ ദൂരദര്‍ശന്‍ സംപ്രേക്ഷണം ചെയ്ത രാമായണം ടിവി സീരിയല്‍ ദൂരദര്‍ശനില്‍ തന്നെയാണ് വീണ്ടും പുനഃസംപ്രേഷണത്തിന് ഒരുങ്ങുന്നത്. എല്ലാ ദിവസവും വൈകുന്നേരം ആറ് മണിക്കാണ് പരമ്പരയുടെ സംപ്രേക്ഷണം നിശ്ചയിച്ചിരിക്കുന്നത്. ഉച്ചയ്ക്ക് 12 മണിക്ക് ഇത് പുന:സംപ്രേക്ഷണം ചെയ്യും. ചാനലിന്റെ ഔദ്യോഗിക ട്വിറ്റര്‍ അക്കൗണ്ടിലൂടെയാണ് ദൂരദര്‍ശന്‍ ഇക്കാര്യം പങ്കുവെച്ചിരിക്കുന്നത്.

ശ്രീരാമനായി അരുണ്‍ ഗോവിലും സീതയായി ദീപിക ചിഖ്‌ലിയയും ലക്ഷ്മണനായി സുനില്‍ ലാഹിരിയുമാണ് അഭിനയിച്ചിരിക്കുന്നത്. രാമായണം സീരിയലില്‍ രാമനായി അഭിനയിച്ച അരുണ്‍ ഗോവില്‍ ഉത്തര്‍പ്രദേശിലെ മീററ്റില്‍ ബിജെപി സ്ഥാനാര്‍ത്ഥിയാണ് എന്നതാണ് മറ്റൊരു പ്രത്യേകത.