എന്‍ഡിഎയില്‍ നിന്ന് പിന്‍മാറണമെന്ന് ബിഡിജെഎസ് കോട്ടയം ജില്ലാ കമ്മിറ്റി; മറ്റു മുന്നണികളിലെ സാധ്യത പരിശോധിക്കാന്‍ ആവശ്യം

കോട്ടയം: ബിജെപി നേതൃത്വത്തിലുള്ള എന്‍ഡിഎ മുന്നണിയില്‍ നിന്ന് പിന്‍മാറണമെന്നാവശ്യപ്പെട്ട് ബിഡിജെഎസ് കോട്ടയം ജില്ലാ കമ്മിറ്റി പ്രമേയം പാസാക്കി. കഴിഞ്ഞ ഒമ്പതു വര്‍ഷമായി ബിജെപിയില്‍ നിന്നും എന്‍ഡിഎയില്‍ നിന്നും അവഗണനയാണ് നേരിടുന്നതെന്ന് പ്രമേയം പറയുന്നു. ബിജെപി ചേര്‍ത്ത് പിടിച്ചില്ല. അര്‍ഹമായ സ്ഥാനമാനങ്ങള്‍ പോലും നല്‍കിയില്ല. എന്‍ഡിഎയില്‍ തുടരേണ്ട ആവശ്യമില്ലെന്നും മറ്റു മുന്നണികളിലുള്ള സാധ്യത സംസ്ഥാന അധ്യക്ഷന്‍ പരിശോധിക്കണമെന്നുമാണ് ആവശ്യം.

പാര്‍ട്ടിയുടെ ജില്ലയിലെ 18 നിയോജക മണ്ഡലം ഭാരവാഹികളും ജില്ലാസംസ്ഥാന ഭാരവാഹികളും പങ്കെടുത്ത ക്യാംപ് തുഷാര്‍ വെള്ളാപ്പള്ളിയാണ് ഉദ്ഘാടനം ചെയ്തത്. ബിഡിജെഎസിന് അര്‍ഹമായ പരിഗണനയോ അധികാരമോ നല്‍കിയില്ലെന്നും പ്രമേയത്തില്‍ കുറ്റപ്പെടുത്തുന്നു. കഴിഞ്ഞ ലോക്‌സഭാ തിരഞ്ഞെടുപ്പില്‍ കോട്ടയം മണ്ഡലത്തിലെ എന്‍ഡിഎ സ്ഥാനാര്‍ഥി തുഷാര്‍ വെള്ളാപ്പള്ളി ആയിരുന്നു.