1991ലെ ആരാധനാലയ നിയമം എന്താണ്? അറിയേണ്ടതെല്ലാം..

ന്യൂഡല്‍ഹി: രാജ്യത്തെ നിയമ വ്യവസ്ഥയെ കാറ്റില്‍ പറത്തി ബാബരി മസ്ജിദ് തകര്‍ക്കുകയും ഭൂമി കൈക്കലാക്കുകയും ചെയ്തതിനു പിന്നാലെ വിവിധയിടങ്ങളിലെ മുസ് ലിം ആരാധനാലയങ്ങള്‍ക്കു മേല്‍ അവകാശവാദങ്ങള്‍ക്കുന്നയിച്ച് ഹിന്ദുത്വ കക്ഷികള്‍ മുന്നോട്ട് വന്നു കൊണ്ടിരിക്കുകയാണ്.

വാരണാസിയിലെ ഗ്യാന്‍വാപി പള്ളിയിലെ വീഡിയോ സര്‍വേയ്‌ക്കെതിരേ പള്ളി കമ്മറ്റി സമര്‍പ്പിച്ച ഹരജിയില്‍ പ്രധാനമായും ചൂണ്ടിക്കാട്ടിയത് ഇത് 1991ലെ ആരാധനാലയ നിയമത്തിന്റെ ലംഘനമാണെന്നാണ്.

പി വി നരസിംഹ റാവുവിന്റെ നേതൃത്വത്തിലുള്ള കോണ്‍ഗ്രസ് ഭരണമാണ് 1991ലെ ആരാധനാലയ നിയമം പാസാക്കിയത്. സ്വാതന്ത്ര്യസമയത്ത് നിലനിന്നിരുന്ന എല്ലാ ആരാധനാലയങ്ങളുടെയും മതപരമായ സ്വഭാവം നിലനിര്‍ത്താന്‍ ഭരണകൂടത്തിന് ക്രിയാത്മകമായ ബാധ്യത ചുമത്തുന്നു എന്നതാണ് ഈ നിയമത്തിന്റെ പ്രത്യേകത.

എന്താണ് 1991ലെ ആരാധനാലയ നിയമം? വ്യവസ്ഥകള്‍ ഇപ്രകാരം

'1947 ഓഗസ്റ്റ് 15ന് നിലവിലുണ്ടായിരുന്ന ഏതെങ്കിലും ആരാധനാലയത്തിന്റെ മതപരമായ സ്വഭാവം നിലനിര്‍ത്തുന്നതിനും ഏതെങ്കിലും ആരാധനാലയത്തിന്റെ മതപരിവര്‍ത്തനവും അതുമായി ബന്ധപ്പെട്ട കാര്യങ്ങള്‍ മാറ്റുന്നതോ നിരോധിക്കുന്നതിനുമുള്ള നിയമം' എന്നാണ് നിയമം വിശദീകരിക്കുന്നത്.

ആക്ടിന്റെ മൂന്നാം വകുപ്പ് പ്രകാരം, ഏതെങ്കിലും ഒരു മതവിഭാഗത്തിന്റെ ആരാധനാലയത്തെ പൂര്‍ണമായോ ഭാഗികമായോ, മറ്റൊരു മതവിഭാഗത്തിന്റെ അല്ലെങ്കില്‍ ഒരേ മതവിഭാഗത്തിന്റെ മറ്റൊരു വിഭാഗത്തിന്റെ ആരാധനാലയമാക്കി മാറ്റുന്നത് തടയുന്നുണ്ട്.

1947 ആഗസ്ത് 15ന് ഒരു ആരാധനാലയത്തിന്റെ മതപരമായ സ്വഭാവം 'നിലവിലുണ്ടായിരുന്നതുപോലെ തന്നെ തുടരും' എന്ന് സെക്ഷന്‍ 4(1) പ്രഖ്യാപിക്കുന്നു. 1947 ആഗസ്ത് 15ന് നിലവിലുള്ള ഏതെങ്കിലും ആരാധനാലയത്തിന്റെ മതപരമായ സ്വഭാവം മാറ്റുന്നതുമായി ബന്ധപ്പെട്ട് ഏതെങ്കിലും കോടതിയുടെ മുമ്പാകെ തീര്‍പ്പുകല്‍പ്പിക്കാത്ത ഏതെങ്കിലും കേസോ നിയമനടപടിയോ റദ്ദാക്കപ്പെടുമെന്നും കൂടാതെ പുതിയ കേസോ നിയമ നടപടികളോ ആരംഭിക്കാന്‍ കഴിയില്ലെന്നും സെക്ഷന്‍ 4(2) പറയുന്നു.

രാമജന്മഭൂമി-ബാബറി മസ്ജിദ് കേസിനും അതുമായി ബന്ധപ്പെട്ട ഏത് കേസിനും അപ്പീലിനും നടപടികള്‍ക്കും ഈ നിയമം ബാധകമല്ലെന്ന് സെക്ഷന്‍ 5 അനുശാസിക്കുന്നു.

ഈ നിയമത്തെ ചോദ്യം ചെയ്ത് ലക്‌നൗ ആസ്ഥാനമായുള്ള വിശ്വഭദ്ര പൂജാരി പുരോഹിത് മഹാസംഘും സനാതന്‍ വേദ മതത്തിന്റെ ചില അനുയായികളും ബിജെപി നേതാവ് അശ്വിനി ഉപാധ്യായയും സമര്‍പ്പിച്ച രണ്ട് ഹര്‍ജികളെങ്കിലും സുപ്രിം കോടതിയുടെ പരിഗണനയിലാണ്. ഭരണഘടനയുടെ അടിസ്ഥാന സവിശേഷതയായ ജുഡീഷ്യല്‍ പുനരവലോകനത്തെ നിയമം തടയുന്നു, യുക്തിരഹിതമായി നിശ്ചയിച്ചിരിക്കുന്ന തീയതി ഹിന്ദുക്കള്‍, ജൈനര്‍, ബുദ്ധമതക്കാര്‍, സിഖുകാര്‍ എന്നിവരുടെ അവകാശങ്ങളെ ലഘൂകരിക്കുന്നു എന്നാണ് ഹര്‍ജിയിലെ വാദം.

2021 മാര്‍ച്ചില്‍ ഉപാധ്യായയുടെ ഹര്‍ജിയില്‍ കോടതി നോട്ടിസ് അയച്ചെങ്കിലും കേന്ദ്രം ഇതുവരെ മറുപടി നല്‍കിയിട്ടില്ല.

1991ലെ നിയമം നടപ്പിലാക്കിയ സാഹചര്യം

രാമക്ഷേത്രത്തിനായുള്ള സമരങ്ങള്‍ അതിന്റെ മൂര്‍ദ്ധന്യത്തില്‍ നിന്ന സമയത്താണ് പ്രധാനമന്ത്രി പി വി നരസിംഹ റാവുവിന്റെ കോണ്‍ഗ്രസ് സര്‍ക്കാര്‍ ഈ നിയമം കൊണ്ടുവന്നത്. ബാബറി മസ്ജിദ് അപ്പോഴും നിലനിന്നിരുന്നു. എന്നാല്‍ എല്‍ കെ അദ്വാനിയുടെ രഥയാത്ര, ബിഹാറില്‍ അറസ്റ്റ്, ഉത്തര്‍പ്രദേശില്‍ കര്‍സേവകര്‍ക്ക് നേരെയുള്ള വെടിവയ്പ്പും വര്‍ഗീയ സംഘര്‍ഷങ്ങളും ആ സമയത്തായിരുന്നു.

പാര്‍ലമെന്റില്‍ ബില്‍ അവതരിപ്പിച്ചുകൊണ്ട് അന്നത്തെ ആഭ്യന്തര മന്ത്രി എസ് ബി ചവാന്‍, സാമുദായിക അന്തരീക്ഷം തകര്‍ക്കുന്ന ആരാധനാലയങ്ങളുടെ പരിവര്‍ത്തനവുമായി ബന്ധപ്പെട്ട് കാലാകാലങ്ങളില്‍ ഉയര്‍ന്നുവരുന്ന വിവാദങ്ങള്‍ കണക്കിലെടുത്ത് ഈ നടപടികള്‍ സ്വീകരിക്കേണ്ടത് ആവശ്യമാണെന്ന് കരുതുന്നുവെന്നും ഏതെങ്കിലും ആരാധനാലയത്തിന്റെ പരിവര്‍ത്തനവുമായി ബന്ധപ്പെട്ട് പുതിയ വിവാദങ്ങള്‍ ഉണ്ടാകുന്നത് ഈ ബില്‍ തടയുമെന്നുമാണ് പറഞ്ഞത്.

ആരാധനാലയ നിയമത്തെക്കുറിച്ചുള്ള ബിജെപി നിലപാട്

പ്രധാന പ്രതിപക്ഷമായിരുന്ന ബിജെപി ബില്ലിനെ എതിര്‍ത്തു. 'പൂച്ചകളുടെ പുരോഗതിക്കെതിരെ പ്രാവുകള്‍ കണ്ണടയ്ക്കുന്നത് പോലെയാണ് ആരാധനാലയങ്ങളുടെ കാര്യത്തില്‍ 1947ലെ തല്‍സ്ഥിതി നിലനിര്‍ത്തുന്നത്. ഇത് വരും തലമുറയില്‍ പ്രശ്‌നങ്ങള്‍ സൃഷ്ടിക്കും.' എന്നാണു എംപി ഉമാഭാരതി പറഞ്ഞത്.

ബാബരി വിഷയം കത്തി നില്‍ക്കുന്ന സമയത്ത് വാരണാസിയിലെയും മഥുരയിലെയും പള്ളികള്‍ കൈയേറുന്നതിനെക്കുറിച്ച് വിഎച്ച്പിയും ബിജെപിയും പലപ്പോഴും സംസാരിച്ചിരുന്നു. അക്കാലത്തെ ഒരു പ്രധാന മുദ്രാവാക്യം ഇതായിരുന്നു, 'അയോധ്യ തോ ബസ് ജാങ്കി ഹേ, കാശി മഥുര ബാക്കി ഹേ (അയോധ്യ ഒരു തുടക്കം മാത്രമാണ്, കാശിയും മഥുരയും വരാനിരിക്കുന്നതേയുള്ളൂ).'

ബാബരി ഭൂമി ഹിന്ദുക്കള്‍ക്ക് നല്‍കികൊണ്ടുള്ള സുപ്രീം കോടതിയുടെ 2019 അന്യായ വിധിക്കു ശേഷം വാരാണസിയിലും മഥുരയിലും ഇതുമായി ബന്ധപ്പെട്ട് ഉയര്‍ന്നുവന്ന ആവശ്യങ്ങളില്‍ നിന്ന് സ്വയം അകന്നുനില്‍ക്കാന്‍ ആര്‍എസ്എസ് ശ്രമിച്ചു. അയോധ്യ വ്യത്യസ്ത സംഭവമാണെന്നായിരുന്നു നിലപാട്.

ആരാധനാലയ നിയമത്തെക്കുറിച്ച് അയോധ്യ വിധിയില്‍ സുപ്രിം കോടതി നിലപാട്

1991ലെ നിയമത്തിന്റെ ഭരണഘടനാ സാധുത ചോദ്യം ചെയ്യപ്പെട്ടിരുന്നില്ല, ബാബറി മസ്ജിദ് വിഷയം കേട്ട സുപ്രീം കോടതി ബെഞ്ചിന് മുമ്പാകെ അത് വന്നിരുന്നില്ല. എന്നാല്‍, നിയമത്തെക്കുറിച്ച് അലഹബാദ് ഹൈക്കോടതിയുടെ ചില നിഗമനങ്ങളോട് വിയോജിപ്പ് രേഖപ്പെടുത്തിയ കോടതി, നിയമത്തെ പിന്തുണച്ച് പ്രത്യേക നിരീക്ഷണങ്ങള്‍ നടത്തിയിരുന്നു.

1947 ഓഗസ്റ്റ് 15ന് സ്വാതന്ത്ര്യം ലഭിച്ച ശേഷം ഇങ്ങനെ ഒരു നിയമം പ്രഖ്യാപിച്ച പാര്‍ലമെന്റ്, എല്ലാ മതവിഭാഗങ്ങള്‍ക്കും അവരുടെ ആരാധനാലയങ്ങള്‍ സംരക്ഷിക്കപ്പെടുമെന്നും അതിന്റെ രീതികളില്‍ മാറ്റം വരുത്തില്ലെന്നും ആത്മവിശ്വാസം നല്‍കുകയാണ് ചെയ്തതെന്ന് കോടതി പറഞ്ഞു.

ഭരണഘടനയുടെ അടിസ്ഥാന സവിശേഷതകളിലൊന്നായ ഇന്ത്യന്‍ രാഷ്ട്രീയത്തിന്റെ മതേതര സവിശേഷതകള്‍ സംരക്ഷിക്കാന്‍ രൂപകല്‍പ്പന ചെയ്ത നിയമമാണ് ആരാധനാലയ നിയമമെന്നും നമ്മുടെ മതേതര മൂല്യങ്ങളുടെ ഒരു പ്രധാന സവിശേഷതയായി സംരക്ഷിക്കുന്ന ഒരു നിയമനിര്‍മ്മാണ ഇടപെടലാണെന്നും കോടതി പറഞ്ഞു.