ബോക്‌സിങില്‍ മേരികോമും ടേബിള്‍ ടെന്നിസില്‍ മണിക ബത്രയും പ്രീക്വാര്‍ട്ടറില്‍

ടോക്കിയോ: ഒളിംപിക്‌സില്‍ ഇന്ത്യയുടെ മെഡല്‍ പ്രതീക്ഷയായ ബോക്‌സിങില്‍ മേരികോം പ്രീക്വാര്‍ട്ടറില്‍ പ്രവേശിച്ചു. വനിതകളുടെ 48-51 ഫ്‌ളൈവെയ്റ്റ് ഇനത്തിലാണ് റിയോ ഒളിംപിക്‌സിലെ വെങ്കല മെഡല്‍ ജേതാവ് കൂടിയായ മേരി കോം അവസാന 16ലേക്ക് ഇടം നേടിയത്. ഡൊമിനിക്ക് റിപ്പബ്ലിക്കിന്റെ മിഗ്വെലിനാ ഹെര്‍ണാണ്ടസ് ഗാര്‍സ്യയെ 4-1ന് പരാജയപ്പെടുത്തിയാണ് ഇതിഹാസ താരം പ്രീക്വാര്‍ട്ടറിലേക്ക് യോഗ്യത നേടിയത്. എന്നാല്‍ മറ്റൊരു പുരുഷ താരമായ മനീഷ് കൗശിക്ക് 57-63 കിലോഗ്രാം വിഭാഗത്തില്‍ പുറത്തായി.

വനിതാ വിഭാഗം ടേബിള്‍ ടെന്നിസില്‍ ഇന്ത്യയുടെ മണിക ബത്ര പ്രീക്വാര്‍ട്ടറില്‍ പ്രവേശിച്ചു. ഉക്രെയ്‌ന്റെ മര്‍ഗരീറ്റ പെസോറ്റ്‌സ്‌കയെയാണ് താരം തോല്‍പ്പിച്ചത്. ഏഴ് സെറ്റ് നീണ്ട പോരാട്ടത്തിലാണ് ഇന്ത്യന്‍ താരം വിജയം കുറിച്ചത്. സ്‌കോര്‍; 4-11, 4-11, 11-7, 12-10, 8-11, 11-5, 11-7. ആദ്യ രണ്ട് സെറ്റ് കൈവിട്ടതിന് ശേഷം തകര്‍പ്പന്‍ തിരിച്ചുവരവ് നടത്തിയാണ് താരം ജയം എത്തിപ്പിടിച്ചത്.