സ്പാനിഷ് താരം വിക്ടര്‍ ബെര്‍ട്ടോമിയു ബ്ലാസ്റ്റേഴ്സ് നിരയിലേക്ക്

കൊച്ചി: ഐ എസ് എല്ലിന്റെ പുതിയ സീസണിന് മുന്നോടിയായി ആക്രമണനിര ശക്തിപ്പെടുത്തുന്നതിന്റെ ഭാഗമായി സ്പാനിഷ് താരം വിക്ടര്‍ ബെര്‍ട്ടോമിയുവിനെ ടീമിലെത്തിച്ച് കേരള ബ്ലാസ്റ്റേഴ്സ് എഫ്.സി. മുന്നേറ്റനിരയില്‍ സ്‌ട്രൈക്കറായും വിങ്ങറായും ഒരുപോലെ കളിക്കാന്‍ മികവുള്ള താരമാണ് ബെര്‍ട്ടോമിയു.

യൂറോപ്പിലും ഏഷ്യയിലുമായി വിവിധ ലീഗുകളില്‍ കളിച്ച അനുഭവസമ്പത്തുമായാണ് ബെര്‍ട്ടോമിയു ബ്ലാസ്റ്റേഴ്സിലെത്തുന്നത്. സ്‌പെയിനിലെ ജിംനാസ്റ്റിക് ഡി ടരാഗോണ, സി.എഫ് അസ്‌കോ, എ.ഇ പ്രാറ്റ് തുടങ്ങിയ ക്ലബ്ബുകള്‍ക്ക് പുറമെ ഹോങ്കോങ്ങ് പ്രീമിയര്‍ ലീഗിലെ ഈസ്റ്റേണ്‍ എഫ്.സി, ഇന്തോനേഷ്യന്‍ ക്ലബ്ബായ ഗ്രെസിക് യുണൈറ്റഡ് എഫ്.സി എന്നിവയ്ക്കായും അദ്ദേഹം പന്തുതട്ടിയിട്ടുണ്ട്. വേഗതയേറിയ നീക്കങ്ങളും ആക്രമണ ശൈലിയും ബെര്‍ട്ടോമിയുവിനെ ശ്രദ്ധേയനാക്കുന്നു.

വിക്ടര്‍ ബെര്‍ട്ടോമിയുവിനെ ടീമിലേക്ക് സ്വാഗതം ചെയ്യുന്നതില്‍ സന്തോഷമുണ്ടെന്ന് കേരള ബ്ലാസ്റ്റേഴ്സ് സിഇഒ അഭിക് ചാറ്റര്‍ജി പറഞ്ഞു. ആക്രമണനിരയില്‍ ഏത് റോളും കൈകാര്യം ചെയ്യാന്‍ മികവുള്ള ബെര്‍ട്ടോമിയു ടീമിന് പുതിയൊരു ഊര്‍ജ്ജം നല്‍കും. വരാനിരിക്കുന്ന സീസണിലെ മല്‍സരങ്ങള്‍ക്കായി ടീമിനെ സജ്ജമാക്കുമ്പോള്‍ അദ്ദേഹത്തിന്റെ സാന്നിധ്യം ഗുണകരമാകുമെന്ന് വിശ്വസിക്കുന്നുവെന്നും അഭിക് ചാറ്റര്‍ജി വ്യക്തമാക്കി. വിക്ടര്‍ ബെര്‍ട്ടോമിയു ഉടന്‍ തന്നെ ടീമിനൊപ്പം ചേര്‍ന്ന് പരിശീലനം ആരംഭിക്കും.

ഫെബ്രുവരി 14ന് കൊല്‍ക്കത്തയില്‍ മോഹന്‍ ബഗാനെതിരെയാണ് ബ്ലാസ്റ്റേഴ്‌സിന്റെ ആദ്യ മല്‍സരം. മല്‍സരക്രമം അനുസരിച്ച് കേരള ബ്ലാസ്റ്റേഴ്‌സിന്റെ ആദ്യ ഹോം മല്‍സരം ഫെബ്രുവരി 22ന് കോഴിക്കോട് ഇഎംഎസ് സ്റ്റേഡിയത്തില്‍ നടക്കും. മുംബൈ സിറ്റി എഫ് സി ആണ് എതിരാളികള്‍. ഫെബ്രുവരി 28, മാര്‍ച്ച് 7,21 ,ഏപ്രില്‍ 15,18, 23 ,മെയ് 10,17 ദിവസങ്ങളിലും കോഴിക്കോട്ട് ബ്ലാസ്റ്റേഴ്‌സിന് ഹോം മല്‍സരങ്ങളുണ്ട്. ബ്ലാസ്റ്റേഴ്‌സിന്റെ എല്ലാ ഹോം മല്‍സരങ്ങളും കോഴിക്കോട് ഇ.എം.എസ് സ്റ്റേഡിയത്തിലാകും നടക്കുക.