ലോകകപ്പിന് യോഗ്യത നേടിയ സൗദി താരങ്ങള്‍ക്ക് ലഭിക്കുക വന്‍ പാരിതോഷികം

ജിദ്ദ: 2026 ലോകകപ്പിന് യോഗ്യത നേടിയ സൗദി ദേശീയ ടീംതാരങ്ങള്‍ക്ക് ലഭിക്കുക വന്‍ തുക . പാരിതോഷികമായാണ് ഈ തുക ലഭിക്കുക. യോഗ്യതാ മത്സരങ്ങളിലെ മികച്ച പ്രകടനവും അര്‍ഹമായ വിജയം കരസ്തമാക്കിയതിനും കളിക്കാര്‍ക്ക് 50 ലക്ഷം റിയാല്‍ വീതം പാരിതോഷികം ലഭിക്കുമെന്നാണ് റിപോര്‍ട്ട്.ജിദ്ദയിലെ കിങ് അബ്ദുല്ല സ്‌പോര്‍ട്‌സ് സിറ്റി സ്റ്റേഡിയത്തില്‍ നടന്ന ഏഷ്യന്‍ പ്ലേ-ഓഫിന്റെ ഗ്രൂപ്പ് ബി-യില്‍ ഇറാഖുമായി 0-0 എന്ന നിലയില്‍ സമനില പാലിച്ചാണ് സൗദി ദേശീയ ഫുട്‌ബോള്‍ ടീം 2026 ലോകകപ്പിന് ഔദ്യോഗികമായി യോഗ്യത നേടിയത്.

ആവേശകരമായ മല്‍സരം വീക്ഷിക്കാന്‍ 60,816 ഫുട്ബോള്‍ ആരാധകര്‍ സ്റ്റേഡിയത്തില്‍ ഒഴുകിയെത്തിയിരുന്നു. തുടര്‍ച്ചയായി മൂന്നാം തവണയും ചരിത്രത്തില്‍ ഏഴാം തവണയുമാണ് സൗദി ടീം ലോകകപ്പ് ഫൈനലിലേക്ക് യോഗ്യത നേടുന്നത്. സൗദി അറേബ്യക്കും ഇറാഖിനും നാല് പോയിന്റുകള്‍ വീതമാണുള്ളത്. മികച്ച ഗോള്‍ വ്യത്യാസത്തിന്റെ അടിസ്ഥാനത്തില്‍ സൗദി ടീം ഗ്രൂപ്പ് ബി-യില്‍ ഒന്നാം സ്ഥാനത്തെത്തിയാണ് ഫൈനലിലേക്ക് യോഗ്യത നേടിയത്.

ആഗോള പ്ലേ-ഓഫില്‍ ഏഷ്യയെ പ്രതിനിധീകരിക്കുന്ന ടീം ഏതെന്ന് നിര്‍ണയിക്കാന്‍ ഗ്രൂപ്പ് എ-യിലെ രണ്ടാം സ്ഥാനക്കാരായ യു.എ.ഇയെ നവംബര്‍ 13,18 തിയ്യതികളില്‍ രണ്ട് പാദങ്ങളുള്ള മത്സരത്തില്‍ ഇറാഖ് നേരിടും. മുമ്പ് ഒരിക്കല്‍ മാത്രം (1986 ല്‍) ലോകകപ്പ് യോഗ്യത നേടിയ ഇറാഖിന് ഇത്തവണത്തെ ലോകകപ്പിന് യോഗ്യത നേടാനുള്ള അവസാന അവസരമാണിത്.