ബ്ലാസ്‌റ്റേഴ്‌സ് ആരാധകര്‍ക്ക് ന്യൂഇയറില്‍ ദു:ഖവാര്‍ത്ത; അഡ്രിയാന്‍ ലൂണയും ടീം വിടുന്നു

കൊച്ചി: ഐ എസ് എല്‍ ചരിത്രത്തിലെ തന്നെ എക്കാലത്തെയും മികച്ച താരങ്ങളിലൊരാളായ അഡ്രിയാന്‍ ലൂണ ഈ സീസണില്‍ കേരള ബ്ലാസ്റ്റേഴ്സിന് വേണ്ടി കളിക്കില്ല. കേരള ബ്ലാസ്റ്റേഴ്സ് തന്നെയാണ് ഇക്കാര്യം സോഷ്യല്‍ മീഡിയയിലൂടെ ഔദ്യോഗികമായി അറിയിച്ചത്. 2025-26 സീസണില്‍ താരം വായ്പയില്‍ ഒരു വിദേശ ക്ലബ്ബിന് വേണ്ടി കളിക്കുമെന്നാണ് മലയാളി ക്ലബ്ബ് അറിയിച്ചത്. കളിക്കാരനും ക്ലബ്ബും തമ്മിലുള്ള പരസ്പര സമ്മതത്തോടെയുള്ള കരാറാണിതെന്നും ക്ലബ്ബ് അറിയിച്ചു.

നാല് വര്‍ഷമായി കേരള ബ്ലാസ്റ്റേഴ്‌സിന്റെ ഏറ്റവും പ്രധാനപ്പെട്ട താരമാണ് ഉറുഗ്വെകാരനായ 33 കാരനായ അഡ്രിയാന്‍ ലൂണ.2021 മുതല്‍ കേരള ബ്ലാസ്റ്റേഴ്‌സിനൊപ്പമുള്ള താരമാണ് അഡ്രിയാന്‍ ലൂണ. 87 മല്‍സരങ്ങളില്‍ ബ്ലാസ്റ്റേഴ്‌സ് ജഴ്‌സിയണിഞ്ഞ ലൂണ 15 ഗോളുകളാണ് നേടിയത്.

കഴിഞ്ഞ സീസണില്‍ താരത്തിന്റെ പ്രകടനം അത്ര നന്നായിരുന്നില്ല. ക്ലബ്ബിന്റെയും തന്റെയും പ്രകടനങ്ങളില്‍ ലൂണ വളരെ നിരാശനായിരുന്നു. ശേഷം ഐ എസ് എല്‍ പ്രതിസന്ധിയിലായതും താരത്തെ കുഴക്കി. ഐ എസ് എല്‍ നടത്താന്‍ ലൂണ ഇന്ത്യന്‍ ഫുട്‌ബോള്‍ ഫെഡറേഷനോട് പരസ്യമായി അപേക്ഷിച്ചതും വാര്‍ത്തയായിരുന്നു.