സ്പാനിഷ് ലീഗ്; ബെന്‍സിമയ്ക്കും വിനീഷ്യസിനും ഡബിള്‍; ജയമില്ലാതെ ബാഴ്‌സ

മാഡ്രിഡ്: സ്പാനിഷ് ലീഗില്‍ ഒന്നാം സ്ഥാനത്തുള്ള റയല്‍ മാഡ്രിഡിന് വമ്പന്‍ ജയം. വലന്‍സിയക്കെതിരേ 4-1ന്റെ ജയമാണ് കരുത്തരായ റയല്‍ നേടിയത്. ജയത്തോടെ ഒന്നാം സ്ഥാനത്തെ ലീഡ് എട്ട് പോയിന്റാക്കി വര്‍ദ്ധിപ്പിക്കാന്‍ റയലിനായി. കരീം ബെന്‍സിമ, വിനീഷ്യസ് ജൂനിയര്‍ എന്നിവര്‍ നേടിയ ഇരട്ട ഗോളുകളാണ് റയലിന് തകര്‍പ്പന്‍ ജയമൊരുക്കിയത്.

മറ്റൊരു മല്‍സരത്തില്‍ 12ാം സ്ഥാനത്തുള്ള ഗ്രനാഡ ബാഴ്‌സയെ 1-1 സമനിലയില്‍ പിടിച്ചു. ഡി ജോങാണ് 57ാം മിനിറ്റില്‍ കറ്റാലന്‍സിന്റെ ലീഡെടുത്തത്.ടീമിലേക്ക് തിരിച്ചെത്തിയ ഡാനി ആല്‍വ്‌സാണ് ഗോളിന് വഴിയൊരുക്കിയത്. എന്നാല്‍ 89ാം മിനിറ്റില്‍ റൊഡ്രിഗസ് ഡയസ്സിലൂടെ ഗ്രനാഡ തിരിച്ചടിക്കുകയായിരുന്നു. ലീഗില്‍ ബാഴ്‌സ ആറാം സ്ഥാനത്താണ്. ബാഴ്‌സ ജയിച്ചാല്‍ മൂന്നാം സ്ഥാനത്തേക്ക് എത്തേണ്ട മല്‍സരമാണ് സമനിലയില്‍ കലാശിച്ചത്.