കാല്‍മുട്ടിന് പരിക്ക് ; മെസ്സി പിഎസ്ജി സ്‌ക്വാഡില്‍ നിന്ന് പുറത്ത്

പാരിസ്: ലയണല്‍ മെസ്സിയുടെ പിഎസ്ജിയിലെ പുതിയ സീസണിലെ യാത്ര അത്ര മികച്ചതല്ല. ഇതുവരെ പിഎസ്ജിയ്ക്കായി സ്‌കോര്‍ ചെയ്യാനാവാത്ത മെസ്സിക്ക് അടുത്ത ആഘാതം പരിക്കിലൂടെയാണ്. ലിയോണിനെതിരായ മല്‍സരത്തില്‍ കാലിന് പരിക്കേറ്റ മെസ്സി മെറ്റ്‌സിനെതിരായ മല്‍സരത്തില്‍ ഇറങ്ങില്ല. മെറ്റ്‌സിനെതിരായ സ്‌ക്വാഡില്‍ മെസ്സിയെ ഉള്‍പ്പെടുത്തിയിട്ടില്ലെന്ന് കോച്ച് പോച്ചീടിനോ അറിയിച്ചു. താരത്തിന്റെ കാല്‍മുട്ടിന്റെ എല്ലിന് ക്ഷതമേറ്റിട്ടുണ്ട്. തുടര്‍ ചികില്‍സയ്ക്കായി താരത്തിന് വിശ്രമം ആവശ്യമാണെന്ന് ക്ലബ്ബ് അറിയിച്ചു. ലിയോണിനെതിരായ മല്‍സരത്തിന്റെ 76ാം മിനിറ്റില്‍ മെസ്സിയെ പിന്‍വലിച്ച് ക്ലബ്ബ് അശ്‌റഫ് ഹക്കീമിയെ ഇറക്കിയിരുന്നു. ഇതില്‍ മെസ്സി നിരാശ പ്രകടിപ്പിച്ചിരുന്നു. എന്നാല്‍ താരം പരിക്കിനെ തുടര്‍ന്ന് ബുദ്ധിമുട്ടിയതിനെ തുടര്‍ന്നാണ് താന്‍ പിന്‍വലിച്ചതെന്ന് കോച്ച് പിന്നീട് അറിയിച്ചിരുന്നു.