ഇന്റര്‍ കാശി ഐ-ലീഗ് ചാംപ്യന്‍മാര്‍, എഐഎഫ്എഫ് അപ്പീല്‍ കമ്മിറ്റിയുടെ വിധി റദ്ദാക്കി

ന്യൂഡല്‍ഹി: ഐ-ലീഗ് ജേതാക്കളെ ചൊല്ലിയുള്ള തര്‍ക്കത്തില്‍ വീണ്ടും ട്വിസ്റ്റ്. നിയമപോരാട്ടങ്ങള്‍ക്കൊടുക്കം പുതിയ ഐ-ലീഗ് ചാമ്പ്യന്‍മാരായി ഇന്റര്‍ കാശിയെ പ്രഖ്യാപിച്ചു. ചര്‍ച്ചില്‍ ബ്രദേഴ്സിനെ ഐ-ലീഗ് ജേതാക്കളായി പ്രഖ്യാപിച്ച അഖിലേന്ത്യാ ഫുട്‌ബോള്‍ ഫെഡറേഷന്റെ അപ്പീല്‍ കമ്മിറ്റിയുടെ വിധി അന്താരാഷ്ട്ര കായിക തര്‍ക്കപരിഹാര കോടതി റദ്ദാക്കി.

അഖിലേന്ത്യാ ഫുട്‌ബോള്‍ ഫെഡറേഷന്റെ അപ്പീല്‍ കമ്മിറ്റി 2025 മേയ് 31-ന് പുറപ്പെടുവിച്ച തീരുമാനത്തിനെതിരേ ഇന്റര്‍ കാശി എഫ്സി 2025 ജൂണ്‍ നാലിന് സമര്‍പ്പിച്ച അപ്പീല്‍ ശരിവെച്ചതായി കോടതി വ്യക്തമാക്കി. നേരത്തേ ഇന്റര്‍ കാശി-നാംധാരി എഫ്‌സി മല്‍സരം സംബന്ധിച്ച എഐഎഫ്എഫ് അപ്പീല്‍കമ്മിറ്റിയുടെ വിധി ഇന്റര്‍ കാശി ടീമിന് എതിരായതോടെയാണ് ചര്‍ച്ചില്‍ ചാംപ്യന്മാരായി പ്രഖ്യാപിക്കപ്പെട്ടത്.

ഐ-ലീഗ് സമാപിച്ചപ്പോള്‍ 40 പോയിന്റുമായി ചര്‍ച്ചില്‍ ഒന്നാമതായിരുന്നു. രണ്ടാമതുള്ള ഇന്റര്‍ കാശിക്ക് 39 പോയിന്റും. ജനുവരി 13-ന് നാംധാരിക്കെതിരായ കളിയില്‍ കാശി ടീം തോറ്റിരുന്നു. എന്നാല്‍, അയോഗ്യനായ താരത്തെ കളിപ്പിച്ചെന്ന് ചൂണ്ടിക്കാട്ടി ഫെഡറേഷന്‍ അച്ചടക്ക സമിതി നാംധാരി തോറ്റതായി പ്രഖ്യാപിക്കുകയും ഇന്റര്‍ കാശിക്ക് മൂന്നുപോയിന്റ് അനുവദിക്കുകയും ചെയ്തു.

ഇതിനെതിരേ അപ്പീല്‍ കമ്മിറ്റിക്ക് നല്‍കിയ പരാതിയിലാണ് നാംധാരിക്ക് അനുകൂലമായി വിധി വന്നത്. അപ്പീല്‍ കമ്മിറ്റിയുടെ വിധി നാംധാരിക്ക് അനുകൂലമായതോടെ ഇന്റര്‍ കാശിക്ക് തിരിച്ചടിയേറ്റു. ചര്‍ച്ചില്‍ ബ്രദേഴ്സ് ലീഗ് ജേതാക്കളുമായി. പിന്നാലെ അപ്പീല്‍കമ്മിറ്റി വിധിക്കെതിരേ ഇന്റര്‍ കാശി അന്താരാഷ്ട കായിക തര്‍ക്ക പരിഹാര കോടതിയെ സമീപിക്കുകയായിരുന്നു. അപ്പീലില്‍ കാശിക്ക് അനുകൂലമായി വിധി വന്നതോടെ ടീം പുതിയ ഐ-ലീഗ് ജേതാക്കളായി.