മുംബൈ സിറ്റി മുന്‍ പരിശീലകന്‍ യോര്‍ഗെ കോസ്റ്റ അന്തരിച്ചു

ലിസ്ബണ്‍: പോര്‍ച്ചുഗല്‍ ക്ലബ്ബായ പോര്‍ട്ടോയുടെ ഇതിഹാസതാരവും ഇന്ത്യന്‍ സൂപ്പര്‍ ലീഗില്‍ മുംബൈ സിറ്റിയുടെ മുന്‍പരിശീലകനുമായ യോര്‍ഗെ കോസ്റ്റ (53) അന്തരിച്ചു. ഹൃദയസ്തംഭനത്തെത്തുടര്‍ന്നായിരുന്നു അന്ത്യം. നിലവില്‍ പോര്‍ട്ടോ ക്ലബ്ബിന്റെ ഫുട്ബോള്‍ ഡയറക്ടറായിരുന്നു. 2018-19 സീസണിലാണ് കോസ്റ്റ മുംബൈ സിറ്റിയെ പരിശീലിപ്പിച്ചത്. 39 കളിയില്‍ ടീമിനെ ഇറക്കിയതില്‍ 17 ജയവും എട്ടുസമനിലയും നേടി. 14 മല്‍സരങ്ങളില്‍ തോറ്റു. കരിയറില്‍ 16 ക്ലബ്ബുകളെ പരിശീലിപ്പിച്ചിട്ടുണ്ട്.

കളിക്കാരനായി പോര്‍ട്ടോ ക്ലബ്ബിനായി തിളങ്ങി. ചാംപ്യന്‍സ് ലീഗും യുവേഫ കപ്പും ഇന്റര്‍ കോണ്ടിനെന്റല്‍ കപ്പും നേടി. എട്ടുതവണ പോര്‍ച്ചുഗല്‍ ലീഗും സ്വന്തമാക്കി. സെന്‍ട്രല്‍ ബാക്കായിരുന്ന താരം പോര്‍ട്ടോക്കായി 383 മല്‍സരങ്ങള്‍ കളിച്ചു. 25 ഗോളും നേടി. പോര്‍ച്ചുഗല്‍ ദേശീയടീമിനായി 50 മല്‍സരം കളിച്ചു. ഇതില്‍ രണ്ടുഗോളുണ്ട്. 1991-ല്‍ അണ്ടര്‍-20 ലോകകപ്പ് ജയിച്ച പോര്‍ച്ചുഗല്‍ ടീമില്‍ അംഗമായിരുന്നു.