ബ്രസീല്‍ തോറ്റു; പന്തയം പാലിച്ച് സുനില്‍ പാതി മീശയെടുത്തു

മലപ്പുറം: കോപ്പാ അമേരിക്ക ഫുട്‌ബോള്‍ മല്‍സരത്തില്‍ തന്റെ ഇഷ്ടടീമായ ബ്രസീല്‍ തോറ്റാല്‍ പാതി മീശയെടുത്ത് ടൗണില്‍ ഒരു പകല്‍ നടക്കുമെന്ന പന്തയം പാലിച്ച് അരീക്കോട് കോഴ കോട്ടൂര്‍ സ്വദേശി സുനില്‍. അരീക്കോട് ടൗണിലെ അമ്മാവന്‍ എന്ന അപരനാമത്തില്‍ അറിയപെടുന്ന സുനില്‍ ബ്രസീലിന്റെ കടുത്ത ആരാധകനാണ്. സാമൂഹിക മാധ്യമങ്ങളില്‍ പന്തയം വൈറലായതോടെ സഹപ്രവര്‍ത്തകര്‍ക്കു മുന്നില്‍ അരീക്കോട് ബസ് സ്റ്റാന്റിലെത്തി സുഹൃത്തുക്കളുടെ മുന്നില്‍ വച്ചാണ് പാതി മീശയെടുത്തത്. വൈകീട്ടോടെ പന്തയ സമയം കഴിഞ്ഞതിനാല്‍ സുനില്‍ ക്ലീന്‍ ഷേവ് ചെയ്തു. ബ്രസീല്‍ തോറ്റാല്‍ പാതി മീശയെടുത്ത് അരീക്കോട് ടൗണിലൂടെ പകല്‍ മുഴുവന്‍ നടക്കുമെന്നായിരുന്നു പന്തയം വച്ചത്. കടകളില്‍ ചുമടെടുത്തും മറ്റുമായി ഉപജീവനം കണ്ടെത്തുകയാണ് സുനില്‍.

യൂറോ കപ്പില്‍ പോര്‍ച്ചുഗല്‍-ഫ്രാന്‍സ് മല്‍സരത്തിനിടെ ഗാലറിയില്‍ നിന്നെടുത്ത അരീക്കോട് സ്വദേശിയുടെ വിഡിയോ വൈറലായിരുന്നു. 'എംബാപ്പേ, ഇങ്ങോട്ട് നോക്ക്, ഞങ്ങള് അരീക്കോട്ടുകാരാണ് ' എന്ന് ഫ്രാന്‍സിന്റെ യുവതാരത്തോട് യുവാക്കള്‍ ഉറക്കെപ്പറയുന്ന ദൃശ്യങ്ങളാണ് സാൂഹിക മാധ്യമങ്ങളില്‍ വൈറലായത്. അരീക്കോടിന്റെ ഫുട്‌ബോള്‍ ആവേശം വാക്കുകളില്‍ ഒതുക്കുവാനില്ലെന്നാണ് ഇതെല്ലാം തെളിയിക്കുന്നത്.

Brazil loses; Sunil took a half mustache in keeping with the bet