ആര്‍സിബി താരം വിവാഹ വാഗ്ദാനം നല്‍കി പീഡിപ്പിച്ചു; പരാതിയുമായി യുപി സ്വദേശിനി

മുംബൈ: റോയല്‍ ചലഞ്ചേഴ്‌സ് ബംഗളൂരു താരം യാഷ് ദയാലിനെതിരെ പീഡന പരാതിയുമായി യുവതി രംഗത്ത്. ആര്‍സിബി താരം തന്നെ വിവാഹ വാഗ്ദാനം നല്‍കി പീഡിപ്പിച്ചെന്നാണ് ഉത്തര്‍പ്രദേശ് സ്വദേശിനി പരാതി നല്‍കിയത്. യുപി മുഖ്യമന്ത്രി യോഗി ആദിത്യനാഥിന്റെ ഓണ്‍ലൈന്‍ പരാതി പരിഹാര പോര്‍ട്ടലിനെയാണ് ഗാസിയാബാദില്‍ നിന്നുളള യുവതി സമീപിച്ചത്. പരാതിയില്‍ അന്വേഷിച്ച് റിപോര്‍ട്ട് സമര്‍പ്പിക്കാന്‍ ഗാസിയാബാദ് ഇന്ദിരാപുരം പോലിസിന് യുപി മുഖ്യമന്ത്രിയുടെ ഓഫിസ് നിര്‍ദേശം നല്‍കി.

യാഷ് ദയാലുമായി അഞ്ച് വര്‍ഷമായി അടുപ്പമുണ്ടായിരുന്നുവെന്നാണ് യുവതി പറയുന്നത്. ഇതിനിടെ തന്നെ മാനസികമായും ശാരീരികമായും ഉപദ്രവിച്ചുവെന്നും യുവതി പരാതിയില്‍ പറയുന്നു. വിവിധ ആവശ്യങ്ങള്‍ പറഞ്ഞ് ആര്‍സിബി താരം തന്നില്‍ നിന്നും പണം തട്ടിയെടുത്തു. ഇങ്ങനെ ഒരുപാട് പെണ്‍കുട്ടികളെ പറ്റിച്ചിട്ടുണ്ടെന്നും പരാതിയില്‍ യുവതി ആരോപിക്കുന്നുണ്ട്. ഇതിനെല്ലാം തെളിവായി ചാറ്റ് സ്‌ക്രീന്‍ ഷോട്ടുകളും വീഡിയോ കോള്‍ രേഖകളും തന്റെ കൈവശമുണ്ടെന്നാണ് യുവതിയുടെ അവകാശവാദം.