ഏഷ്യാ കപ്പ് ടിക്കറ്റ് വില്‍പ്പനയില്‍ വന്‍ ഇടിവ്; ഇന്ത്യ- പാക് പോരാട്ടത്തിന് ആളില്ല

അബുദാബി: ഏഷ്യാ കപ്പിലെ ഇന്ത്യ- പാക് ക്രിക്കറ്റ് പോരാട്ടത്തിന്റെ ടിക്കറ്റുകള്‍ പൂര്‍ണമായി വിറ്റു തീര്‍ന്നിട്ടില്ലെന്നു റിപോര്‍ട്ടുകള്‍. ഈ മാസം 14ന് ദുബായിലാണ് ഇന്ത്യ- പാക് ഏഷ്യാ കപ്പ് പോരാട്ടം. ഓഗസ്റ്റ് 29 മുതലാണ് ടിക്കറ്റ് വില്‍പ്പന ആരംഭിച്ചത്. ഇന്നലെ രാത്രി 9 മണി വരെയുള്ള കണക്കനുസരിച്ച് 50 ശതമാനം പോലും ടിക്കറ്റുകള്‍ വിറ്റു തീര്‍ന്നിട്ടില്ല. പ്രീമിയം സീറ്റിനാണ് ഏറ്റവും കൂടുതല്‍ വില. ഒരു പ്രീമിയം സീറ്റിന് 4 ലക്ഷം വരെ മുടക്കണം.

ചാംപ്യന്‍സ് ട്രോഫി ക്രിക്കറ്റിലെ ഇന്ത്യ- പാകിസ്താന്‍ മല്‍സരം ഇതേ വേദിയിലാണ് നടന്നത്. അന്ന് വില്‍പ്പന തുടങ്ങി മണിക്കൂറുകള്‍ കൊണ്ടു മുഴുവന്‍ ടിക്കറ്റുകളും വിറ്റു തീര്‍ന്നിരുന്നു. എന്നാല്‍ ഇത്തവണ അതല്ല സ്ഥിതി. ചാംപ്യന്‍സ് ട്രോഫി ടിക്കറ്റുകള്‍ അതിവേഗം വിറ്റു പോയപ്പോള്‍ ഇത്തവണ വില്‍പ്പന കുത്തനെ കുറഞ്ഞതില്‍ എമിറെറ്റ്സ് ക്രിക്കറ്റ് ബോര്‍ഡ് അധികൃതര്‍ ആശ്ചര്യം പ്രകടിപ്പിച്ചു. ഇന്ത്യ- പാക് പോരാട്ടങ്ങളില്‍ വലിയ മാറ്റം വരുന്നതിന്റെ സൂചനയായാണ് പലരും ടിക്കറ്റ് വില്‍പ്പന കുറഞ്ഞതിനെ കണക്കാക്കുന്നത്. ഇന്ത്യ പാകിസ്താനെതിരേ ക്രിക്കറ്റ് കളിക്കുന്നതിനെതിരേയും വലിയ തോതിലുള്ള എതിര്‍പ്പുകളുണ്ട്. അതിനിടെയാണ് ടിക്കറ്റ് വില്‍പ്പനയിലും കുത്തനെ ഇടിവ് സംഭവിച്ചിരിക്കുന്നത്.