സൗദിയില്‍ ശക്തമായ പൊടിക്കാറ്റ്; കാലാവസ്ഥാ മാറ്റത്തിന്റെ സൂചന

റിയാദ്; സൗദിയില്‍ കാലാവസ്ഥാ മാറ്റത്തിന്റെ ഭാഗമായി ശക്തമായ പൊടിക്കാറ്റും മഴയും. കഴിഞ്ഞ ദിവസം മധ്യ കിഴക്കന്‍ പ്രവിശ്യകളില്‍ പല സ്ഥലങ്ങളിലും മഴ ലഭിച്ചപ്പോള്‍ തിങ്കളാഴ്ച പല സ്ഥലങ്ങളിലും ശക്തമായ പൊടിക്കാറ്റ് അനുഭവപ്പെട്ടു. ഞായറാഴ്ച രാജ്യത്തെ മധ്യ കിഴക്കന്‍ പ്രവിശ്യയുടെ വിവിധ ഭാഗങ്ങളില്‍ ശക്തമായ മഴയാണ് ലഭിച്ചത്. ചില സ്ഥലങ്ങളില്‍ ഇടിയോടുകൂടിയാണ് മഴ പെയ്തത്.

റിയാദ്, കിഴക്കന്‍ പ്രവിശ്യ, അല്‍ ഖസീം എന്നിവിടങ്ങളില്‍ കാലാവസ്ഥ മാറ്റം ഉണ്ടാകുമെന്നു കാലാവസ്ഥ നിരീക്ഷണ വിഭാഗം നേരത്തെ അറിയിച്ചിരുന്നു. തിങ്കളാഴ്ച ജുബൈല്‍, ദമ്മാം, അല്‍ ഖോബാര്‍ തുടങ്ങിയ പ്രവിശ്യയിലെ മിക്ക സ്ഥലങ്ങളിലും പൊടിക്കാറ്റ് അനുഭവപ്പെട്ടു. പൊടിക്കാറ്റില്‍ ദൂരക്കാഴ്ച കുറയാന്‍ സാധ്യതയുള്ളതിനാല്‍ വാഹനം ഓടിക്കുന്നവര്‍ ജാഗ്രത പാലിക്കണമെന്ന് സിവില്‍ ഡിഫെന്‍സ് അറിയിച്ചു.