യുഎസ് പ്രസിഡന്റ് തിരഞ്ഞെടുപ്പ്; കമല ഹാരിസ് ജയിച്ചാല്‍ രണ്ടു വര്‍ഷത്തിനകം ഇസ്രായേല്‍ ഇല്ലാതാകും: ട്രംപ്

വാഷിങ്ടണ്‍: യുഎസ് പ്രസിഡന്റ് തിരഞ്ഞെടുപ്പില്‍ കമല ഹാരിസ് ജയിച്ചാല്‍ രണ്ടു വര്‍ഷത്തിനകം ഇസ്രായേല്‍ ഇല്ലാതാകുമെന്ന് ഡോണള്‍ഡ് ട്രംപ്. തിരഞ്ഞെടുപ്പിന് മുന്നോടിയായുള്ള സംവാദത്തിലാണ് ട്രംപിന്റെ മറുപടി. ട്രംപ് വരുത്തിയ വിനകള്‍ നീക്കുകയാണ് പ്രസിഡനറ് ജോ ബൈഡനെന്ന് കമല ഹാരിസ് സംവാദത്തില്‍ പറഞ്ഞു. ബൈഡന്റെ ഭരണത്തില്‍ അമേരിക്കന്‍ മധ്യവര്‍ഗം തിരിച്ചടി നേരിടുന്നെന്നായിരുന്നു ട്രംപിന്റെ മറുപടി.

ക്യാപ്പിറ്റല്‍ ആക്രമണം സംബന്ധിച്ചും ചൂടേറിയ സംവാദമാണ് ഇരുവരും തമ്മില്‍ നടക്കുന്നത്. തനിക്ക് ഖേദമില്ലെന്നും സമാധാനപരമായ പ്രതിഷേധത്തിനാണ് ആഹ്വാനം ചെയ്തതെന്നും ട്രംപ് പറഞ്ഞു. അമേരിക്ക അപമാനിക്കപ്പെട്ട സംഭവമെന്ന് ആക്രമണത്തെ കമല വിശേഷിപ്പിച്ചു. ട്രംപിനെതിരായ ക്രിമിനല്‍ കുറ്റങ്ങള്‍ കമല ആയുധമാക്കിയപ്പോള്‍ അഭയാര്‍ഥി പ്രശ്‌നങ്ങള്‍ അടക്കം ട്രംപ് ആയുധമാക്കി. ഗര്‍ഭഛിദ്ര നിയമങ്ങളിലും ശക്തമായ വാഗ്വാദമാണ് നടന്നത്. സംവാദം തുടങ്ങും മുന്‍പ് കമല ഹാരിസും ട്രംപും പരസ്പരം ഹസ്തദാനം നടത്തി.