ബഗ്ദാദ് വിമാനത്താവളത്തിന് നേരേ റോക്കറ്റാക്രമണം; എട്ടുപേര്‍ കൊല്ലപ്പെട്ടു, രണ്ട് കാറുകള്‍ പൊട്ടിത്തെറിച്ചു

ബഗ്ദാദ്: ഇറാഖിന്റെ തലസ്ഥാനമായ ബഗ്ദാദിലെ അന്താരാഷ്ട്ര വിമാനത്താവളത്തിനു നേരെയുണ്ടായ റോക്കറ്റാക്രമണത്തില്‍ എട്ടുപേര്‍ കൊല്ലപ്പെട്ടു. നിരവധിപേര്‍ക്ക് പരിക്കേറ്റിട്ടുണ്ട്. മൂന്ന് റോക്കറ്റുകളാണ് വിമാനത്താവളത്തില്‍ പതിച്ചത്. ആക്രമണത്തില്‍ രണ്ടുകാറുകള്‍ പൊട്ടിത്തെറിച്ചതായി ഇറാഖ് സൈന്യം അറിയിച്ചു. അതേസമയം, ആക്രമണത്തിനു പിന്നില്‍ ആരാണെന്നു ഇറാഖ് സര്‍ക്കാര്‍ വ്യക്തമാക്കിയിട്ടില്ല.

ഇറാനും സഖ്യകക്ഷികളും കൂടുതല്‍ ആക്രമണങ്ങള്‍ ആസൂത്രണം ചെയ്യുന്നതായി സൂചനകളുണ്ടെന്ന് യുഎസ് പ്രതിരോധ സെക്രട്ടറി മാര്‍ക്ക് എസ്പര്‍ വ്യാഴാഴ്ച വ്യക്തമാക്കിയിരുന്നു. പ്രകോപനപരമായ പെരുമാറ്റം മാസങ്ങളായി നിലനില്‍ക്കുന്നു. ബഗ്ദാദിലെ യുഎസ് എംബസിക്കു സംരക്ഷണം നല്‍കാനായി കൂടുതല്‍ സൈനികരെ അയയ്ക്കുമെന്നും യുഎസ് പ്രതിരോധ സെക്രട്ടറി അറിയിച്ചതിന് പിന്നാലെയാണ് ആക്രമണമുണ്ടായിരിക്കുന്നത്.