അമേരിക്കയില്‍ ഇന്ത്യന്‍ കുടുംബത്തിലെ മൂന്നുപേര്‍ നീന്തല്‍ക്കുളത്തില്‍ മുങ്ങിമരിച്ചു

വാഷിങ്ടണ്‍: അമേരിക്കയിലെ ന്യൂജഴ്‌സിയില്‍ ഇന്ത്യന്‍ കുടുംബത്തിലെ മൂന്ന് അംഗങ്ങളെ മുങ്ങിമരിച്ച നിലയില്‍ കണ്ടെത്തി. ന്യൂജേഴ്സിയിലെ ഈസ്റ്റ് ബ്രന്‍സ്വിക്കില്‍ പുതുതായി വാങ്ങിയ വീട്ടിലെ നീന്തല്‍ക്കുളത്തിലാണ് മൃതദേഹങ്ങള്‍ കണ്ടെത്തിയത്. ഭരത് പട്ടേല്‍ (62) മരുമകള്‍ നിഷ പട്ടേല്‍ (33) നിഷയുടെ എട്ടുവയസുകാരി മകള്‍ എന്നിവരാണ്് മരിച്ചത്. തിങ്കളാഴ്ച വൈകീട്ടാണ് അപകടം നടന്നതെന്നാണ് അന്താരാഷ്ട്രമാധ്യമങ്ങള്‍ റിപോര്‍ട്ട് ചെയ്യുന്നത്. അയല്‍ക്കാര്‍ വിവരമറിയിച്ചതിനെ തുടര്‍ന്നാണ് പോലിസ് സ്ഥലത്തെത്തിയത്.

പരിശോധന നടത്തിയശേഷം മുങ്ങിമരണമാണ് സംഭവിച്ചതെന്ന് പോലിസ് വക്താവ് ലഫ്റ്റനന്റ് ഫ്രാങ്ക് സട്ടര്‍ അറിയിച്ചു. നീന്തല്‍ക്കുളത്തിന്റെ അറ്റകുറ്റപ്പണി കഴിഞ്ഞതിനു പിന്നാലെയാണ് ദുരന്തം. കുടുംബം രണ്ടാഴ്ച മുമ്പ് മാത്രമാണ് ഇവിടെ താമസിക്കാനെത്തിയതെന്നും നീന്തല്‍ക്കുളത്തിന്റെ അറ്റകുറ്റപ്പണി നടത്തിയിരുന്നതായും അയല്‍ക്കാരിലൊരാളായ വിശാല്‍ മാക്കിന്‍ മാധ്യമങ്ങളോട് പറഞ്ഞു. മരണം സംബന്ധിച്ച് കൂടുതല്‍ വിശദാംശങ്ങള്‍ പോലിസ് നല്‍കിയിട്ടില്ല.