സുരേഷ് ഗോപിയുടെ പുലിപ്പല്ല് മാല: പരാതിക്കാരനോട് നേരിട്ട് ഹാജരാകാന്‍ നോട്ടീസ്

തൃശൂര്‍: കേന്ദ്ര മന്ത്രിയും നടനുമായ സുരേഷ് ഗോപിയുടെ മാലയില്‍ പുലിപ്പല്ലുണ്ടെന്ന പരാതിയില്‍ അന്വേഷണം തുടങ്ങി വനംവകുപ്പ്. കേസില്‍ പരാതിക്കാരായ യൂത്ത് കോണ്‍ഗ്രസ് നേതാവ് എ.എ. മുഹമ്മദ് ഹാഷിമിയോട് മൊഴി നല്‍കാന്‍ പട്ടിക്കാട് റേഞ്ച് ഓഫീസര്‍ നോട്ടീസ് നല്‍കി. ജൂലായ് 21ന് നേരിട്ട് ഹാജരായി തെളിവുകളും രേഖകളും ഹാജരാക്കാനാണ് നോട്ടീസില്‍ അറിയിച്ചിരിക്കുന്നത്.

വേടന്റെ പുലിപ്പല്‍ കേസിനു പിന്നാലെയാണ് സുരേഷ് ഗോപിക്കെതിരായ പരാതി ഉയരുന്നത്. തുടര്‍ന്ന് കഴിഞ്ഞ മാസം 16ന് സംസ്ഥാന പോലിസ് മേധാവിക്ക് ഹാഷിം പരാതി നല്‍കിയിരുന്നത്. പുലിപ്പല്ല് മാല ധരിച്ച് നടക്കുന്ന സുരേഷ് ഗോപിയുടെ ദൃശ്യങ്ങള്‍ സഹിതം നല്‍കിയായിരുന്നു പരാതി. ഈ പരാതി പിന്നീട് വനംവകുപ്പിന് കൈമാറുകയായിരുന്നു.