കോട്ടയം മെഡിക്കല് കോളജിലെ ഹൃദയം മാറ്റിവയ്ക്കല് ശസ്ത്രക്രിയ വിജയം
ഹാര്ട്ട് റിജക്ഷന് സാധ്യതയും ഇന്ഫെക്ഷന് സാധ്യതയുമുള്ളതിനാല് രോഗിയെ 24 മണിക്കൂര് വെന്റിലേറ്ററിലാക്കിയിട്ടുണ്ട്. രണ്ടാഴ്ച കഴിയുന്നതുവരെ രോഗി പൂര്ണനിരീക്ഷണത്തിലുമായിരിക്കും.
തിരുവനന്തപുരം: ലോക്ക് ഡൗണ് കാലത്ത് അവയവദാനപ്രക്രിയയിലൂടെ നടന്ന ആദ്യ ഹൃദയംമാറ്റിവയ്ക്കല് ശസ്ത്രക്രിയ വിജയമാണെന്ന് ഡോക്ടര്മാര് അറിയിച്ചതായി ആരോഗ്യമന്ത്രി കെ കെ ശൈലജ. കോട്ടയം മെഡിക്കല് കോളജില് ചികില്സയിലായിരുന്ന കെ സി ജോസിനാണ് (62) ഹൃദയം മാറ്റിവച്ചത്. ഹാര്ട്ട് റിജക്ഷന് സാധ്യതയും ഇന്ഫെക്ഷന് സാധ്യതയുമുള്ളതിനാല് രോഗിയെ 24 മണിക്കൂര് വെന്റിലേറ്ററിലാക്കിയിട്ടുണ്ട്. രണ്ടാഴ്ച കഴിയുന്നതുവരെ രോഗി പൂര്ണനിരീക്ഷണത്തിലുമായിരിക്കും. സംസ്ഥാനത്ത് സര്ക്കാര് മേഖലയിലെ ആറാമത്തെ ഹൃദയം മാറ്റിവയ്ക്കല് ശസ്ത്രക്രിയയാണിത്. ഈ 6 ശസ്ത്രക്രിയകളും കോട്ടയം മെഡിക്കല് കോളജിലാണ് നടന്നത്.
ഹൃദയം മാറ്റിവയ്ക്കല് ശസ്ത്രക്രിയയ്ക്ക് നേതൃത്വം നല്കിയ കോട്ടയം മെഡിക്കല് കോളജ് സൂപ്രണ്ട് ഡോ. ജയകുമാര് ഉള്പ്പെടെ എല്ലാവരേയും അഭിനന്ദിക്കുന്നതായും മന്ത്രി വ്യക്തമാക്കി. ബൈക്ക് അപകടത്തെത്തുടര്ന്ന് തിരുവന്തപുരത്തെ സ്വകാര്യാശുപത്രിയില് ചികില്സയിലായിരുന്ന ശ്രീകുമാറിന് (50) മസ്തിഷ്ക മരണം സംഭവിച്ചതിനെ ത്തുടര്ന്നാണ് ബന്ധുക്കള് അവയവദാനത്തിന് തയ്യാറായത്. ഇതിലൂടെ നാലുപേര്ക്കാണ് പുതുജീവന് സമ്മാനിച്ചത്. സര്ക്കാരിന്റെ അവയവദാന ഔദ്യോഗിക ഏജന്സിയായ മൃതസഞ്ജീവിനിയാണ് അവയവദാനപ്രക്രിയ ഏകോപിപ്പിച്ചത്. കൊവിഡ് വ്യാപിക്കുന്നതിനാല് ലോകത്താകമാനം അവയവദാന പ്രക്രിയ നിലച്ചമട്ടാണ്. എന്നാല്, കേരളം കൊവിഡിനെ നിയന്ത്രണത്തിലാക്കിയ പശ്ചാത്തലത്തിലാണ് അവയവദാന പ്രക്രിയ യാഥാര്ഥ്യമാക്കാന് സാധിച്ചത്.
ഡോ. ജയകുമാറിന്റെ നേതൃത്വത്തിലുള്ള ഡോക്ടര്മാര് വെള്ളിയാഴ്ച രാത്രിയാണ് തിരുവന്തപുരത്തെത്തിയത്. പുലര്ച്ചെ 3.15ന് ഹൃദയമെടുക്കുകയും റോഡ് മാര്ഗത്തില് അതിരാവിലെ 5.15ന് കോട്ടയം മെഡിക്കല് കോളജിലെത്തിക്കുകയും ചെയ്തു. നേരത്തെ 5 മണിക്ക് തുടങ്ങിയ ശസ്ത്രക്രിയയില് ഈ സംഘം പങ്കാളികളായി. 3 മണിക്കൂറോളമാണ് ശസ്ത്രക്രിയ നീണ്ടുനിന്നത്. ഹൃദയം മാറ്റിവയ്ക്കുന്നതിന് ആവശ്യമായ മരുന്ന് എറണാകുളത്തുനിന്നും ഫയര്ഫോഴ്സ് 40 മിനിറ്റുകൊണ്ട് എത്തിച്ചു. ഒരു വൃക്ക തിരുവനന്തപുരം മെഡിക്കല് കോളജില് ചികില്സയിലുള്ള രോഗിക്കും ഒരുവൃക്കയും കരളും സ്വകാര്യാശുപത്രിയില് ചികില്സയിലുള്ള രോഗിക്കുമാണ് നല്കിയത്. അതീവദു:ഖത്തിലും അവയവദാനത്തിന് സന്നദ്ധരായ ശ്രീകുമാറിന്റെ കുടുംബം ചെയ്തത് വലിയ ത്യാഗമാണെന്ന് മന്ത്രി കെ കെ ശൈലജ പറഞ്ഞു. അവയവദാനം യാഥാര്ഥ്യമാക്കിയ മൃതസഞ്ജീവിനി ഉള്പ്പെടെയുള്ള എല്ലാവരെയും മന്ത്രി അഭിനന്ദിച്ചു.
RELATED STORIES
കൊച്ചിയിലെ കുഞ്ഞിന്റെ മരണം തലയോട്ടി തകര്ന്ന്, കീഴ്ത്താടി പൊട്ടി
3 May 2024 4:20 PM GMTഅബൂദബിയില് കാണാതായ ചാവക്കാട് സ്വദേശിയെ മരിച്ച നിലയില് കണ്ടെത്തി
3 May 2024 3:01 PM GMTതൂശൂരില് ബസ്സില് ജീപ്പിടിച്ച് രണ്ട് മരണം; 12 പേര്ക്കു പരിക്ക്
3 May 2024 2:54 PM GMTകള്ളക്കടല് പ്രതിഭാസ മുന്നറിയിപ്പ്; ബീച്ചിലേക്കുള്ള യാത്രയും കടലിലെ...
3 May 2024 11:53 AM GMTകൊച്ചിയിലെ നവജാത ശിശുവിന്റെ കൊലപാതകം; മൂന്ന് പേര് കസ്റ്റഡിയില്
3 May 2024 10:49 AM GMTഉഷ്ണതരംഗം: മദ്റസകള്ക്ക് മെയ് ആറ് വരെ അവധി
3 May 2024 10:36 AM GMT