പി സി ജോര്‍ജിനെ നിയമസഭാ എത്തിക്‌സ് കമ്മിറ്റിയില്‍നിന്ന് ഒഴിവാക്കി

തിരുവനന്തപുരം: പൂഞ്ഞാര്‍ എംഎല്‍എ പി സി ജോര്‍ജിനെ നിയമസഭയുടെ എത്തിക്‌സ് കമ്മിറ്റിയില്‍നിന്ന് ഒഴിവാക്കി. ജലന്ധര്‍ മുന്‍ ബിഷപ്പ് ഫ്രാങ്കോ മുളയ്ക്കലിനെതിരേ പീഡനപരാതി നല്‍കിയ കന്യാസ്ത്രീക്കെതിരേ അപകീര്‍ത്തികരമായ പരാമര്‍ശം നടത്തിയതിനെ തുടര്‍ന്നാണു നടപടി. ജോര്‍ജിനു പകരം പിറവം എംഎല്‍എ അനൂപ് ജേക്കബിനെ കമ്മിറ്റിയില്‍ ഉള്‍പ്പെടുത്തി. എ പ്രദീപ്കുമാറാണു സമിതിയുടെ അധ്യക്ഷന്‍. കന്യാസ്ത്രീയെ അധിക്ഷേപിച്ച സംഭവത്തില്‍ ജോര്‍ജിനെതിരായ പരാതി എത്തിക്‌സ് കമ്മിറ്റിയുടെ പരിഗണനയിലാണ്.

കന്യാസ്ത്രീയെ അവഹേളിച്ച സംഭവത്തില്‍ സമിതി ജോര്‍ജില്‍നിന്നു തെളിവെടുത്തിരുന്നു. എന്നാല്‍, റിപോര്‍ട്ട് സമര്‍പ്പിച്ചിട്ടില്ല. ഈ കമ്മിറ്റിയില്‍ ജോര്‍ജ് തുടരുന്നതില്‍ നേരത്തെ തന്നെ വിമര്‍ശനമുയര്‍ന്നിരുന്നു. പരാതി പരിഗണിച്ച സമിതി യോഗങ്ങളില്‍ ചട്ടമനുസരിച്ച് ജോര്‍ജ് പങ്കെടുത്തിരുന്നില്ല. അതേസമയം, ഭൂമി കൈയേറ്റം, പരിസ്ഥിതി നിയമലംഘനം തുടങ്ങി ഒട്ടേറെ ആരോപണങ്ങളുയര്‍ന്നിട്ടും പി വി അന്‍വര്‍ എംഎല്‍എയെ നിയമസഭയുടെ പരിസ്ഥിതി സമിതിയില്‍ ഇപ്പോഴും തുടരുകയാണ്.