മഞ്ചേശ്വരത്ത് പഴക്കുലയുമായി വന്ന വാനില്‍നിന്ന് ഒരു ക്വിന്റല്‍ കഞ്ചാവ് പിടികൂടി

ഉപ്പള: പഴക്കുല കയറ്റിയ വാനില്‍ കടത്തിയ ഒരു ക്വിന്റല്‍ കഞ്ചാവ് പിടികൂടി. വാനിലുണ്ടായിരുന്ന രണ്ടംഗസംഘം വാനുപേക്ഷിച്ച് കടന്നുകളഞ്ഞു. പഴക്കുലയുമായി വന്ന കര്‍ണാടക രജിസ്ട്രേഷനുള്ള പിക്കപ്പ് വാനില്‍നിന്നാണ് 108 കിലോ കഞ്ചാവ് പിടികൂടിയത്. പിടികൂടിയ കഞ്ചാവിന് 20 ലക്ഷത്തോളം വിലവരും. മഞ്ചേശ്വരം സിഐ അനൂപ്, എഎസ്‌ഐ രാമചന്ദ്രന്‍ എന്നിവര്‍ വാഹനപരിശോധനയ്ക്കിടെ കൈകാണിച്ചപ്പോള്‍ പിക്കപ്പ് വാന്‍ നിര്‍ത്താതെ ഓടിച്ചുപോയി.

പോലിസ് പിന്തുടര്‍ന്നതോടെ മഞ്ചേശ്വരം യത്തീംഖാന റോഡിലേക്ക് ഓടിച്ചുകയറ്റിയ വാന്‍ റോഡ് പണി നടക്കുന്നതു കണ്ട് വാനുപേക്ഷിച്ച് ഓടിരക്ഷപ്പെടുകയായിരുന്നു. സിഐ അനൂപ്, എസ്ഐ ബാലചന്ദ്രന്‍, ഡ്രൈവര്‍മാരായ അഭിജിത്ത്, പ്രവീണ്‍, സിവില്‍ പോലിസ് ഓഫിസര്‍ മനു എന്നിവരാണ് സംഘത്തിലുണ്ടായിരുന്നത്.