ബസ് യാത്രയ്ക്കിടെ മാല മോഷണം; ഡിഎംകെ വനിത പഞ്ചായത്ത് പ്രസിഡന്റ് പിടിയില്‍

തിരുപ്പത്തൂര്‍: ബസ് യാത്രയ്ക്കിടെ മാല മോഷ്ടിച്ച പഞ്ചായത്ത് പ്രസിഡന്റ് പിടിയില്‍. തിരുപ്പത്തൂര്‍ നരിയംപെട്ട് പഞ്ചായത്ത് പ്രസിഡന്റ് ഭാരതിയാണ് പിടിയിലായത്. ഡിഎംകെ വനിതാ വിഭാഗം ജില്ലാ നേതാവാണ്. നേര്‍ക്കുണ്ട്രം സ്വദേശിയുടെ മാലയാണ് മോഷ്ടിച്ചത്. ഭാരതിയെ റിമാന്‍ഡ് ചെയ്തു. പൊതുപ്രവര്‍ത്തനത്തിനൊപ്പം മോഷണവും ഒരു ഹോബിയാക്കിയ ഈ വനിതാ നേതാവിനെ അറസ്റ്റ് ചെയ്ത ശേഷം കോടതിയില്‍ ഹാജരാക്കി ജുഡീഷ്യല്‍ കസ്റ്റഡിയില്‍ റിമാന്‍ഡ് ചെയ്തു.

കാഞ്ചീപുരത്ത് നടന്ന ഒരു വിവാഹ സല്‍ക്കാരത്തില്‍ പങ്കെടുത്ത ശേഷം ബസില്‍ വീട്ടിലേക്ക് മടങ്ങുകയായിരുന്ന നേര്‍ക്കുണ്ട്രം സ്വദേശി വരലക്ഷ്മിയുടെ അഞ്ച് പവന്‍ തൂക്കമുള്ള സ്വര്‍ണ്ണമാലയാണ് മോഷണം പോയത്. കോയമ്പേട് ബസ് സ്റ്റാന്‍ഡില്‍ ഇറങ്ങിയ ശേഷമാണ് ബാഗിലുണ്ടായിരുന്ന മാല നഷ്ടപ്പെട്ടതായി വരലക്ഷ്മി മനസ്സിലാക്കിയത്. തുടര്‍ന്ന് അവര്‍ ഉടന്‍ തന്നെ പൊലീസില്‍ പരാതി നല്‍കി.

പോലിസ് നടത്തിയ അന്വേഷണത്തില്‍ കോയമ്പേട് ബസ് സ്റ്റാന്‍ഡിലെ സിസിടിവി ദൃശ്യങ്ങള്‍ പരിശോധിച്ചപ്പോള്‍ വരലക്ഷ്മിയുടെ ബാഗില്‍ നിന്ന് ഒരു സ്ത്രീ മാല മോഷ്ടിക്കുന്നതായി കണ്ടെത്തി. തുടര്‍ന്ന് നടത്തിയ അന്വേഷണത്തിലാണ് മോഷ്ടാവ് തിരുപ്പത്തൂര്‍ പഞ്ചായത്ത് പ്രസിഡന്റായ ഭാരതിയാണെന്ന് വ്യക്തമായത്. 56 വയസ്സുള്ള ഭാരതിക്കെതിരെ തിരുപ്പത്തൂര്‍, വെല്ലൂര്‍, അമ്പൂര്‍ എന്നിവിടങ്ങളില്‍ നിരവധി കേസുകള്‍ നിലവിലുണ്ടെന്ന് പോലിസ് അന്വേഷണത്തില്‍ കണ്ടെത്തി.