അഡ്‌വെഞ്ച്വര്‍ ടൂറിസം പ്രമോഷന്‍ സൊസൈറ്റി സിഇഒ മനേഷ് ഭാസ്‌ക്കര്‍ അന്തരിച്ചു

തിരുവനന്തപുരം: കേരള അഡ്‌വെഞ്ച്വര്‍ ടൂറിസം പ്രമോഷന്‍ സൊസൈറ്റി സിഇഒ മനേഷ് ഭാസ്‌ക്കര്‍(43) അന്തരിച്ചു. കൊവിഡ് ബാധിതനായി ചെന്നൈയില്‍ ചികിത്സയിലായിരുന്നു. എസ്എഫ്‌ഐയുടെ ആദ്യ അഖിലേന്ത്യ പ്രസിഡന്റ് സി ഭാസ്‌ക്കരന്റെയും ദേശാഭിമാനി മുന്‍ ന്യൂസ് എഡിറ്റര്‍ തുളസി ഭാസ്‌ക്കരന്റെയും ഇളയ മകനാണ്. മുഖ്യമന്ത്രിയുടെ അഡി. പ്രൈവറ്റ് സെക്രട്ടറി ദിനേഷ് ഭാസ്‌കര്‍ സഹോദരനാണ്.

നേരത്തെ മലബാര്‍ ടൂറിസം കോ ഓപറേറ്റീവ് ലിമിറ്റഡിന്റെ സിഇഒ ആയും മനേഷ് പ്രവര്‍ത്തിച്ചിട്ടുണ്ട്. കഴിഞ്ഞ ഒന്നര മാസമായി ചികിത്സയിലായിരുന്നു. ഒരാഴ്ച മുന്‍പാണ് ചെന്നൈയിലെ ആശുപത്രിയിലേക്ക് മാറ്റിയത്. ഇന്ന് രാവിലെയോടെ മരിച്ചു.