നാടന്‍ ചാരായവും വാഷും പിടികൂടി; പരിശോധന കര്‍ശനമാക്കി പോലിസ്

കോഴിക്കോട്: ബീവറേജ് ഔട്ട്‌ലെറ്റുകളും ബാറുകളും താല്‍ക്കാലികമായി അടച്ച സാഹചര്യത്തില്‍ ജില്ലയിലെ വ്യാജ മദ്യ നിര്‍മ്മാണത്തിനെതിരെ പരിശോധന കര്‍ശനമാക്കി പോലിസ്. പരിശോധനയില്‍ കാക്കൂര്‍ മാണിക്യം കണ്ടി സത്യന്‍ (62) എന്നയാളുടെ വീട്ടില്‍ നിന്നും 200 ലിറ്റര്‍ വാഷും, ആറ് ലിറ്റര്‍ നാടന്‍ ചാരായവും, വാറ്റ് ഉപകരണങ്ങളും പിടികൂടി.

കാക്കൂര്‍ എസ്‌ഐ ആഗേഷിന്റെ നേതൃത്വത്തിലുള്ള സംഘമാണ് പരിശോധന നടത്തി പ്രതിയെ അറസ്റ്റ് ചെയ്തത്. ഇത് കൂടാതെ തിരുവമ്പാടി സ്‌റ്റേഷന് പരിധിയിലുള്ള മുത്തപ്പന്‍ പുഴയില്‍ നടത്തിയ റെയ്ഡിലും വാഷും, വാറ്റുപകരണങ്ങളും പിടിച്ചെടുത്തതായും റൂറല്‍ ജില്ലാ പരിധിയില്‍ പരിശോധന ശക്തമാക്കുമെന്നും ജില്ലാ പോലിസ് മേധാവി (റൂറല്‍) ഡോ. എ ശ്രീനിവാസ് അറിയിച്ചു.