ഹോം ഐസൊലേഷനില് കഴിയുന്നവര് ശ്രദ്ധിക്കേണ്ട കാര്യങ്ങള്; സ്വയം നിരീക്ഷണം പ്രധാനം
ബുദ്ധിമുട്ടുണ്ടായാല് ദിശ 1056, 0471 2552056 എന്നീ നമ്പരുകളിലോ ആരോഗ്യ പ്രവര്ത്തകരേയോ വിവരമറിയിക്കണം
തിരുവനന്തപുരം: ഹോം ഐസൊലേഷനില് കഴിയുന്നവര് അല്പം ശ്രദ്ധിച്ചാല് രോഗ വ്യാപനം കുറയ്ക്കാനും പെട്ടന്ന് സുഖം പ്രാപിക്കാനും സാധിക്കുമെന്ന് ആരോഗ്യ മന്ത്രി കെകെ ശൈലജ ടീച്ചര്. കൊവിഡ് പോസിറ്റീവ് ആണെങ്കിലും മറ്റ് രോഗ ലക്ഷണങ്ങളില്ലെങ്കില് റൂം ഐസൊലേഷനാണ് നല്ലതെന്ന് കൊവിഡിന്റെ ഒന്നാം തരംഗത്തില് തന്നെ നമ്മള് തെളിയിച്ചതാണ്. ഗൃഹാന്തരീക്ഷമാണ് പലരും ആഗ്രഹിക്കുന്നത്. മറ്റ് പ്രശ്നങ്ങളില്ലാത്ത കൊവിഡ് രോഗികള്ക്ക് ഡോക്ടര് നിര്ദേശിക്കുന്ന അത്യാവശ്യ മരുന്നും പൂര്ണ വിശ്രമവും കൊണ്ട് രോഗം മാറും. ഇവര്ക്ക് എന്തെങ്കിലും ബുദ്ധിമുട്ടുകളുണ്ടെങ്കില് ഉടന് ആരോഗ്യ പ്രവര്ത്തകരെ വിവരം അറിയിക്കാം. സംസ്ഥാനത്ത് കൊവിഡ് രോഗികളുടെ എണ്ണം വര്ധിച്ച സാഹചര്യത്തില് ഡിസ്ചാര്ജ് മാര്ഗ രേഖയും പുതുക്കിയിരുന്നു. ഇതിലൂടെ രോഗത്തിന്റെ ഗുരുതരാവസ്ഥയനുസരിച്ച് വിദഗ്ധ ചികിത്സ നല്കാന് സാധിക്കുന്നു. മാത്രമല്ല ആശുപത്രി നിറയാതെ എല്ലാവര്ക്കും ചികിത്സ നല്കാനും സാധിക്കുമെന്നും മന്ത്രി വ്യക്തമാക്കി.
ഹോം ഐസൊലേഷന് എങ്ങനെ?
ബാത്ത് അറ്റാച്ച്ഡ് ആയതും വായൂ സഞ്ചാരമുള്ളതുമായ മുറിയിലാണ് ഹോം ഐസൊലേഷനിലുള്ളവര് കഴിയേണ്ടത്. അതിന് സൗകര്യമില്ലാത്തവര്ക്ക് ഡൊമിസിലിയറി കെയര്സെന്ററുകള് ലഭ്യമാണ്. എ.സിയുള്ള മുറി ഒഴിവാക്കണം. വീട്ടില് സന്ദര്ശകരെ പൂര്ണമായും ഒഴിവാക്കണം. ഹോം ഐസൊലേഷന് എന്നത് റൂം ഐസൊലേഷനാണ്. അതിനാല് മുറിക്ക് പുറത്തിറങ്ങാന് പാടില്ല. ഇടയ്ക്കിടയ്ക്ക് കൈകള് കഴുകണം. അഥവാ മുറിക്ക് പുറത്ത് രോഗി ഇറങ്ങിയാല് സ്പര്ശിച്ച പ്രതലങ്ങള് അണുവിമുക്തമാക്കണം. വീട്ടിലുള്ള എല്ലാവരും മാസ്ക് ധരിക്കണം. ജനിതക മാറ്റം വന്ന വൈറസ് റിപോര്ട്ട് ചെയ്യുന്ന സാഹചര്യത്തില് രണ്ട് മാസ്ക് ധരിക്കുന്നത് നല്ലതാണ്. രോഗീ പരിചണം നടത്തുന്നവര് എന് 95 മാസ്ക് ധരിക്കേണ്ടതാണ്.
സാധനങ്ങള് കൈമാറരുത്
ആഹാര സാധനങ്ങള്, ടിവി റിമോട്ട്, ഫോണ് മുതലായ വസ്തുക്കള് രോഗമില്ലാത്തവരുമായി പങ്കുവയ്ക്കാന് പാടില്ല. കഴിക്കുന്ന പാത്രങ്ങളും ധരിച്ച വസ്ത്രങ്ങളും അവര് തന്നെ കഴുകുന്നതായിരിക്കും നല്ലത്. നിരീക്ഷണത്തിലുള്ള വ്യക്തി ഉപയോഗിച്ച പാത്രം, വസ്ത്രങ്ങള്, മേശ, കസേര, ബാത്ത്റൂം മുതലായവ ബഌച്ചിങ് ലായനി (1 ലിറ്റര് വെള്ളത്തില് 3 ടിസ്പൂണ് ബഌച്ചിങ് പൗഡര്) ഉപയോഗിച്ച് വൃത്തിയാക്കേണ്ടതാണ്.
വെള്ളവും ആഹാരവും വളരെ പ്രധാനം
വീട്ടില് കഴിയുന്നവര് ധാരാളം വെള്ളം കുടിക്കേണ്ടതാണ്. ഫ്രിഡ്ജില് വച്ച തണുത്ത വെള്ളവും ഭക്ഷണ പദാര്ത്ഥങ്ങളും ഒഴിവാക്കേണ്ടതാണ്. ചൂടുള്ളതും പോഷക സമൃദ്ധവുമായ ഭക്ഷണ പദാര്ത്ഥങ്ങള് കഴിക്കണം. പറ്റുമെങ്കില് പലതവണ ചെറുചൂടുള്ള വെള്ളം ഉപയോഗിച്ച് തൊണ്ട ഗാര്ഗിള് ചെയ്യുന്നത് നന്നായിരിക്കും. ഉറക്കം വളരെ പ്രധാനമാണ്. 8 മണിക്കൂറെങ്കിലും ഉറങ്ങുക.
സ്വയം നിരീക്ഷണം ഏറെ പ്രധാനം
വീട്ടില് ഐസോലേഷനില് കഴിയുന്നവര് ദിവസവും സ്വയം നിരീക്ഷിക്കേണ്ടതാണ്. സങ്കീര്ണതകള് വരികയാണെങ്കില് നേരത്തെ കണ്ടുപിടിക്കാനും വിദഗ്ധ ചികിത്സ ലഭ്യമാക്കാനും സ്വയം നിരീക്ഷണം ഏറെ സഹായിക്കും. പള്സ് ഓക്സി മീറ്റര് വീട്ടില് കരുതുന്നത് നന്നായിരിക്കും. പള്സ് ഓക്സി മീറ്ററിലൂടെ കാണിക്കുന്ന ഓക്സിജന്റെ അളവ്, നാഡിമിടിപ്പ് എന്നിവയും ഉറക്കവും മറ്റ് രോഗ ലക്ഷണങ്ങളും ദിവസവും ഒരു ബുക്കില് കുറിച്ച് വയ്ക്കേണ്ടതാണ്.
രക്തത്തിലെ ഓക്സിജന്റെ അളവ് കുറയുന്നത് കൊണ്ടാണ് കൊവിഡ് രോഗിയെ ഗുരുതരാവസ്ഥയിലാക്കുന്നത്. അതിനാല് പള്സ് ഓക്സീമീറ്റര് കൊണ്ട് ദിവസവും രക്തത്തിലെ ഓക്സിജന്റെ അളവ് നോക്കണം. ഈ പരിശോധനയിലൂടെ ഓക്സിജന്റെ കുറവ് കാരണം ശ്വാസംമുട്ട് വരുന്നതിന് വളരെ മുമ്പ് തന്നെ ഓക്സിജന് കുറഞ്ഞ് തുടങ്ങിയെന്ന് അറിയാന് സാധിക്കുന്നു. സാധാരണ ഒരാളുടെ ശരീരത്തിലെ ഓക്സിജന്റെ അളവ് 96ന് മുകളിലായിരിക്കും. ഓക്സിജന്റെ അളവ് 94ല് കുറവായാലും നാഡിമിടിപ്പ് 90ന് മുകളിലായാലും ഉടന് തന്നെ ആരോഗ്യ പ്രവര്ത്തകരെ വിവരം അറിയിക്കേണ്ടതാണ്. 6 മിനിറ്റ് നടന്ന ശേഷം രക്തത്തിലെ ഓക്സിജന്റെ അളവ് നേരത്തെയുള്ളതില് നിന്ന് 3 ശതമാനമെങ്കിലും കുറവാണെങ്കിലും ശ്രദ്ധിക്കണം. ചെറിയ രോഗലക്ഷണങ്ങളുള്ളവര്ക്ക് ഇ സഞ്ജീവനി വഴിയും ചികിത്സ തേടാം.
അപായ സൂചനകള് തിരിച്ചറിയണം
ഹോം ഐസൊലേഷനില് കഴിയുന്നെങ്കിലും ആരോഗ്യ പ്രവര്ത്തകര് ഒരു വിളിക്കപ്പുറം തന്നെയുണ്ട്. ശ്വാസം മുട്ടല്, നെഞ്ചുവേദന, നെഞ്ചിടിപ്പ്, അമിതമായ ക്ഷീണം, അമിതമായ ഉറക്കം, കഫത്തില് രക്തത്തിന്റെ അംശം കാണുക, തീവ്രമായ പനി, ബോധക്ഷയം അല്ലെങ്കില് മോഹാലസ്യപ്പെടുക തുടങ്ങിയവ അപായ സൂചകങ്ങളാണ്. തലച്ചോറില് ഓക്സിജന് കാര്യമായി എത്താത്തത് കൊണ്ടുള്ള പ്രശ്നങ്ങളാലാണ് ഇവയില് പലതും ഉണ്ടാകുന്നത്. ഈ അപായ സൂചനകളോ മറ്റെന്തെങ്കിലും ബുദ്ധിമുട്ടുകളോ ഉണ്ടായാല് ദിശ 1056, 0471 2552056 എന്നീ നമ്പരുകളിലോ ബന്ധപ്പെടാറുള്ള ആരോഗ്യ പ്രവര്ത്തകരേയോ വിവരമറിയിക്കണം. ഈ സാഹചര്യത്തില് ഒട്ടും പരിഭ്രമപ്പെടാതെ ആംബുലന്സ് എത്തുന്നതുവരെ കമിഴ്ന്ന് കിടക്കേണ്ടതാണ്. ഇത്തരം മുന്കരുതലുകളിലൂടെ ഈ വ്യാപനത്തെ കഴിയുന്നതും വേഗം നമുക്ക് അതിജീവിക്കാന് സാധിക്കും.
RELATED STORIES
അടൂരിൽ അരളിച്ചെടിയുടെ ഇല കഴിച്ച പശുവും കിടാവും ചത്തു
6 May 2024 8:49 AM GMTപരാതികളേറുന്നു; പ്രജ്ജ്വല് രേവണ്ണ കീഴടങ്ങിയേക്കും
6 May 2024 7:09 AM GMTഫലസ്തീന് അനുകൂല നിലപാട്: സാദിഖ് ഖാന് മൂന്നാം തവണയും ലണ്ടന് മേയര്; ...
6 May 2024 6:58 AM GMTപാലക്കാട് യുവതിക്കുനേരെ ആസിഡ് ആക്രമണം; കൃത്യത്തിന് പിന്നില്...
6 May 2024 6:50 AM GMTഅമേഠിയിലെ കോണ്ഗ്രസ് പാര്ട്ടി ഓഫീസില് ആക്രമണം; വാഹനങ്ങള് അടിച്ചു...
6 May 2024 6:47 AM GMTവീണ്ടും ബഹിരാകാശത്തേക്ക് പറക്കാനൊരുങ്ങി സുനിതാ വില്യംസ്
6 May 2024 6:42 AM GMT