വിഴിഞ്ഞം: ജസ്റ്റിസ് സി എന്‍ രാമചന്ദ്രന്‍ നായര്‍ കമ്മീഷന്‍ റിപോര്‍ട് സര്‍ക്കാര്‍ പുറത്തുവിടണമെന്ന്് മുന്‍ തുറമുഖ വകുപ്പ് മന്ത്രി കെ ബാബു

കൊച്ചി: വിഴിഞ്ഞം തുറമുഖ കരാറിലെ അഴിമതി ആരോപണം അന്വേഷിച്ച ജസ്റ്റിസ് സി എന്‍ രാമചന്ദ്രന്‍ നായര്‍ കമ്മീഷന്‍ റിപോര്‍ട് സര്‍ക്കാര്‍ പുറത്തുവിടണമെന്ന് കഴിഞ്ഞ യുഡിഎഫ് സര്‍ക്കാരിലെ തുറമുഖ വകുപ്പ് മന്ത്രി കൂടിയായിരുന്ന കെ ബാബു.വിഴിഞ്ഞം പദ്ധതിയുമായി ബന്ധപ്പെട്ട് ഉമ്മന്‍ ചാണ്ടി സര്‍ക്കാര്‍ കൈക്കൊണ്ട തീരുമാനം ശരിയായിരുന്നു എന്ന് തെളിഞ്ഞതില്‍ ഏറെ സന്തോഷമുണ്ട്. സംസ്ഥാനത്തിന്റെ താല്‍്പര്യം മാത്രമാണ് തങ്ങള്‍ പരിഗണിച്ചത്. വിഴിഞ്ഞം മലയാളിയുടെ സ്വപ്ന പദ്ധതിയാണ്. തങ്ങള്‍ അന്ന് ആ തീരുമാനമെടുത്തില്ലായിരുന്നു എങ്കില്‍ വിഴിഞ്ഞം പദ്ധതി യാഥാര്‍ഥ്യമാകില്ലായിരുന്നു. വേണമെങ്കില്‍ ഒരു കൂട്ടരുടെ ഗൂഢമായ താല്‍്പര്യങ്ങള്‍ക്ക് വശംവദരായി അവരുടെ ആരോപണങ്ങള്‍ക്ക് മുമ്പില്‍ ഉമ്മന്‍ ചാണ്ടി സര്‍ക്കാരിന് മുട്ടുമടക്കാമായിരുന്നു. എന്നാല്‍ തങ്ങള്‍ പദ്ധതിയുമായി മുന്നോട്ടു പോയി. ഇന്ന് ആ തീരുമാനം ശരിയെന്ന് തെളിഞ്ഞിരിക്കുന്നു. ഉമ്മന്‍ ചാണ്ടി സര്‍ക്കാരിനെയും വകുപ്പ് മന്ത്രി എന്ന നിലയില്‍ തന്നെയും വിഴിഞ്ഞം പദ്ധതിയുടെ പേരില്‍ അഴിമതിക്കാരെന്ന് മുദ്രകുത്തിയവരുടെ നിലപാടുകള്‍ ഇനിയെങ്കിലും അവര്‍ തിരുത്തണമെന്നും കെ ബാബു ആവശ്യപ്പെട്ടു