ബെവ്‌കോയുടെ പേരില്‍ വ്യാജ വെബ്‌സൈറ്റ്; പോലിസും എക്സൈസും അന്വേഷണം അരംഭിച്ചു

തിരുവനന്തപുരം: ബിവറേജസ് കോർപറേഷൻ്റെ പേരിൽ വ്യാജ വെബ്സൈറ്റ് ആരംഭിച്ച തട്ടിപ്പ് നടത്തിയ സംഭവത്തിൽ എക്സൈസ് വിഭാഗം അന്വേഷണം ആരംഭിച്ചു. കൊച്ചിയിൽ കൺസ്യൂമർ ഫെഡിന്റെ വിദേശ മദ്യഷോപ്പിന്റെ പേരിൽ കഴിഞ്ഞ ദിവസമാണ് ഫേസ്ബുക്കിൽ കോർപറേഷന്റെ പേരും ലോഗോയും സഹിതമുള്ള പേജ് പ്രത്യക്ഷപ്പെട്ടത്. കൺസ്യൂമർ ഫെഡിന്റെ പരാതിയുടെ അടിസ്ഥാനത്തിൽ കടവന്ത്ര പോലിസും കേസെടുത്ത് അന്വേഷണം ആരംഭിച്ചു.

ബിവറേജസ് കോർപറേഷനും കൺസ്യൂമർ ഫെഡും ഓൺലൈൻ വഴി മദ്യ വിൽപന തുടങ്ങിയെന്ന വ്യാജ സന്ദേശമാണ് വെബ്സൈറ്റ് വഴി പ്രചരിപ്പിക്കുന്നത്. 24 മണിക്കൂർ ഡെലിവറിയാണ് ഇവരുടെ വാഗ്ദാനം. ഫോൺനമ്പർ സഹിതം നൽകിയാണ് തട്ടിപ്പ് നടത്തുന്നത്. മേൽവിലാസം നൽകി ക്യാഷ് ഓൺ ഡെലിവറിയായും ഓൺലൈനായും പണം അടയ്ക്കാം. ബുക്കിങ് പൂർത്തിയായാൽ തൊട്ടുപിന്നാലെ ഇ-മെയിൽ സന്ദേശവും എസ്എംഎസും ലഭിക്കും. എന്നാൽ മദ്യം മാത്രം ലഭിക്കില്ല.

ലോക്ക് ഡൗൺ നീട്ടിയ സാഹചര്യത്തിൽ ഓൺലൈൻ വഴി മദ്യം എത്തിക്കാൻ സംസ്ഥാന സർക്കാർ ആദ്യം പദ്ധതിയിട്ടെങ്കിലും ഹൈക്കോടതി ഇടപെട്ടതോടെ പിന്മാറി. ഇതിന്റെ മറപറ്റിയാണ് പുതിയ ഓൺലൈൻ തട്ടിപ്പുകാർ രംഗത്തിറങ്ങിയത്. കോർപറേഷന്റെ പേരും ലോഗോയുമുള്ള സൈറ്റിൽ ഇന്ത്യൻ, വിദേശ നിർമിത ബ്രാൻഡുകളിലുള്ള മദ്യത്തിന്റെ ഡിസ്പ്ലേയുണ്ട്. ബെവ്കോയിൽ കിട്ടുന്ന മദ്യത്തിന്റെ വില സഹിതമുള്ള ഡിസ്പ്ലേ നോക്കി തിരഞ്ഞെടുത്ത് ഓൺലൈനായി പണം നൽകി ബുക്ക് ചെയ്യാം.