മഴയില്‍ വ്യാപക നാശനഷ്ടം; തൃശൂരില്‍ ഇടിമിന്നലേറ്റ് വീടുകളില്‍ വിള്ളല്‍, കണ്ണൂരില്‍ വീടുകളിലും വ്യാപാര സ്ഥാപനങ്ങളിലും വെള്ളംകയറി

കണ്ണൂര്‍: കേരളത്തില്‍ മഴയില്‍ വ്യാപക നാശനഷ്ടം. തൃശ്ശൂര്‍ മാള പുത്തന്‍ചിറയില്‍ ഇടിമിന്നലേറ്റ് വീടുകള്‍ക്ക് നാശനഷ്ടമുണ്ടായി. കിഴക്കുംമുറി സ്വദേശി സ്റ്റീഫന്റെ വീടിന്റെ മേല്‍ക്കൂരക്കും ചുമരിനും വിള്ളലുണ്ടായി. വീടിന്റെ മീറ്റര്‍ ബോര്‍ഡും വൈദ്യുത ഉപകരണങ്ങളും പൂര്‍ണ്ണമായും നശിച്ച അവസ്ഥയിലാണ്. ഇടിമിന്നലിന്റെ ആഘാതത്തില്‍ വീടിന്റെ മേല്‍ക്കൂരക്കും ചുമരിനും വിള്ളലുകള്‍ സംഭവിച്ചിട്ടുണ്ട്. സമീപത്തെ ചില വീടുകള്‍ക്കും ചെറിയ തോതില്‍ നാശനഷ്ടങ്ങള്‍ റിപോര്‍ട്ട് ചെയ്തിട്ടുണ്ട്.

മാള പള്ളിപ്പുറത്ത് തെങ്ങ് വീണുണ്ടായ അപകടത്തില്‍ വീട്ടുകാര്‍ അദ്ഭുതകരമായി രക്ഷപ്പെട്ടു. മാളപള്ളിപ്പുറം താണികാട് തൈവളപ്പില്‍ സിറാജിന്റെ ഓട് മേഞ്ഞ വീടിന് മുകളില്‍ തെങ്ങ് കടപുഴകി വീഴുകയായിരുന്നു. മേല്‍ക്കൂരയും വാഷിംഗ് മെഷീനും അടുക്കള ഉപകരണങ്ങളും തകര്‍ന്നിട്ടുണ്ട്. സിറാജ്, ജേഷ്ഠന്‍ സുരാജ്, ഭാര്യ ഷാജിത, മക്കള്‍ ശിഹാബ്, ഷാനവാസ് എന്നിവര്‍ അത്ഭുതകരമായി രക്ഷപ്പെട്ടു

കനത്ത മഴയില്‍ കണ്ണൂര്‍ ചെറുപുഴയില്‍ വ്യാപക നാശനഷ്ടം റിപോര്‍ട്ട് ചെയ്തു. വീടുകളിലും വ്യാപാര സ്ഥാപനങ്ങളിലും വെള്ളംകയറി. ശക്തമായ മഴയില്‍ മതില്‍ തകര്‍ന്നു വീണു. കൊച്ചിയില്‍ ഇടിമിന്നലോട് കൂടിയ വ്യാപകമായ മഴയാണ് പെയ്യുന്നത്. അങ്കമാലി ആലുവ പ്രദേശങ്ങളില്‍ വെള്ളക്കെട്ട് രൂപപ്പെട്ടു. ജില്ലയില്‍ യെല്ലോ അലോട്ട് പ്രഖ്യാപിച്ചിരുന്നു. മഴയെത്തുടര്‍ന്ന് പലയിടത്തും ഗതാഗതക്കുരുക്കുണ്ടായി. കനത്ത മഴയെ തുടര്‍ന്നുണ്ടായ ഇടിമിന്നലില്‍ ഇലഞ്ഞി കൊല്ലകെമ്പില്‍ ഗോപിനാഥന്‍ന്റെ വീട് ഭാഗികമായി തകര്‍ന്നു. വീട്ടിലെ വൈദ്യുതി ഉപകരണങ്ങളും വയറിങ്ങും പൂര്‍ണ്ണമായി കത്തി നശിച്ചു. ഭിത്തികള്‍ക്കും കേടുപാടുകള്‍ സംഭവിച്ചിട്ടുണ്ട്.

തിരുവനന്തപുരം മലയോര മേഖലയിലും ശക്തമായ മഴയുയുണ്ട്. തിരുവനന്തപുരം തെങ്കാശി റോഡിലെ ഇളവട്ടത്ത് റോഡില്‍ വെള്ളം കയറി അതേസമയം ഇടുക്കിയില്‍ മഴയുടെ ശക്തി കുറഞ്ഞെങ്കിലും ആശങ്ക തുടരുകയാണ്. ഇന്ന് അതിതീവ്ര മഴ മുന്നറിയിപ്പാണ് ജില്ലയില്‍ പുറപ്പെടുവിച്ചിട്ടുള്ളത്. മുല്ലപ്പെരിയാര്‍ അണക്കെട്ടിന്റെ 13 സ്പില്‍വേ ഷട്ടറുകളും തുറന്ന് പെരിയാറിലേക്ക് വെള്ളമൊഴുക്കുന്നത് തുടരുകയാണ്.അടുത്ത അഞ്ചുദിവസം ശക്തമായ മഴ തുടരാന്‍ സാധ്യതയുണ്ടെന്നാണ് മുന്നറിയിപ്പ്.