വിശന്ന് ഭക്ഷണം കാത്തു നിന്നവര്‍ക്കിടയിലേക്ക് മിനി വാന്‍ പാഞ്ഞുകയറി; നിരവധി പേര്‍ക്ക് പരിക്ക്

കൊച്ചി: എറണാകുളത്ത് സമൂഹ അടുക്കളയില്‍ നിന്നും ഭക്ഷണം എത്തുന്നതും കാത്ത് വഴിയരുകില്‍ നിന്ന അതിഥി തൊഴിലാളികള്‍ അടക്കമുള്ളവരുടെയിടയിലേക്ക് മിനി വാന്‍ പാഞ്ഞുകയറി നിരവധി പേര്‍ക്ക് പരിക്കേറ്റു. രണ്ടു പേരുടെ നില ഗുരുതരം.എല്ലാവരെയും എറണാകുളത്തെ ജനറല്‍ ആശുപത്രിയില്‍ പ്രവേശിപ്പിച്ചു.ഇന്ന് ഉച്ചയോടെയാണ് സംഭവം. എറണാകുളം ടൗണ്‍ ഹാളിനു സമീപം ഭക്ഷണം കാത്തു നിന്നവര്‍ക്കിടയിലേക്കാണ് കുപ്പിവെള്ളവുമായി ആലുവ ഭാഗത്തു നിന്നും വരികയായിരുന്ന മിനി വാന്‍ നിയന്ത്രണം വിട്ട് പാഞ്ഞുകയറിയത്.

എറണാകുളം നോര്‍ത്ത് മേല്‍പാലം ഇറങ്ങി വന്ന വാന്‍ നിയന്ത്രണം വിട്ട് ആളുകളുടെ ഇടയിലേക്ക് പാഞ്ഞുകയറിയ ശേഷം സമീപത്ത് വലിയ മരിത്തില്‍ ഇടിച്ചാണ് നിന്നത്.വെയിലായിരുന്നതിനാല്‍ ഈ മരത്തിന്റെ തണലിലായിരുന്നു അതിഥി തൊഴിലാളികള്‍ അടക്കമുള്ളവര്‍ ഭക്ഷണം കാത്ത് നിന്നത്.അതിഥി തൊഴിലാളികള്‍ അടക്കം നാലു പേര്‍ക്കും വാഹനത്തിന്റെ ഡ്രൈവര്‍ക്കുമാണ് അപകടത്തില്‍ പരിക്കേറ്റത്. പരിക്കേറ്റവരെ ഈ സമയം അവിടെയുണ്ടായിരുന്ന നാട്ടുകാരും ഫോട്ടോ ഗ്രാഫറും എറണാകുളം പ്രസ് ക്ലബ്ബ് ജില്ലാ കമ്മിറ്റിയംഗവുമായ സതീഷും ചേര്‍ന്നാണ് അതുവഴിയെത്തിയ ആബുലന്‍സില്‍ ആശുപത്രിയില്‍ എത്തിച്ചത്.

പലര്‍ക്കും മുഖത്തും തലയക്കുമാണ് പരിക്കേറ്റിരിക്കുന്നത്.പരിക്കേറ്റവരില്‍ ഒരാള്‍ സംസാരിക്കാന്‍ കഴിവില്ലാത്തയാളാണെന്ന്് രക്ഷാ പ്രവര്‍ത്തനത്തില്‍ പങ്കെടുത്തയാള്‍ പറഞ്ഞു.അപകടം നടക്കുന്ന സമയത്ത് സ്ഥലത്ത് പോലിസുണ്ടായിരുന്നില്ലെന്നും എല്ലാം കഴിഞ്ഞതിനു ശേഷമാണ് പോലിസ് എത്തിയതെന്നും രക്ഷാ പ്രവര്‍ത്തനത്തില്‍ പങ്കെടുത്തവര്‍ പറഞ്ഞു.