മൂവാറ്റുപുഴയാര്‍ നീന്തിക്കടക്കാന്‍ ശ്രമിക്കുന്നതിനിടെ യുവാവ് മുങ്ങിമരിച്ചു

കോട്ടയം: സുഹൃത്തുക്കള്‍ക്കൊപ്പം മൂവാറ്റുപുഴയാറില്‍ കുളിക്കാനിറങ്ങിയ യുവാവ് മുങ്ങി മരിച്ചു. എറണാകുളം ഇടകൊച്ചി കൊടിപ്പറമ്പില്‍ ജോര്‍ജിന്റെ മകന്‍ ലിബിന്‍ ജോര്‍ജ് (24) ആണ് മരിച്ചത്. വൈക്കം ഉദയനാപുരം വൈക്കപ്രയാര്‍ ആറ്റുവേലക്കടവില്‍ ചൊവ്വാഴ്ച വൈകീട്ടായിരുന്നു അപകടം. വൈക്കപ്രയാര്‍ കടത്തുകടവിനു സമീപത്തുള്ള മനശ്രീ ആശ്രമത്തില്‍ കെട്ടിടത്തിന്റെ മേല്‍ക്കൂരയുടെ പണിയ്ക്കായെത്തിയതായിരുന്നു ലിബിന്‍.

പണി കഴിഞ്ഞ് വൈകീട്ട് സുഹൃത്തുക്കളായ ഹരീഷ്, നിഷാദ് എന്നിവരുമൊത്ത് മരണപ്പെട്ട ലിബിന്‍ പുഴയുടെ മറുകരയിലേയ്ക്കു നീന്തുന്നതിനിടെ മുങ്ങിത്താഴുകയായിരുന്നു. സുഹൃത്തുക്കള്‍ രക്ഷിക്കാന്‍ ശ്രമം നടത്തിയെങ്കിലും വിഫലമായി. പിന്നീട് വൈക്കത്തുനിന്ന് ഫയര്‍ഫോഴ്‌സും പോലിസും നടത്തിയ തിരച്ചിലിനൊടുവില്‍ രണ്ടരമണിക്കൂറിനുശേഷം ആറ്റുവേലക്കടവില്‍ നിന്നാണ് മൃതദേഹം കണ്ടെത്തിയത്.