വട്ടിയൂർക്കാവ്‌ ഉപതിരഞ്ഞെടുപ്പ്: തന്റെ പേരിൽ വ്യാജപ്രചാരണം നടക്കുന്നതായി നടൻ അലൻസിയർ

തിരുവനന്തപുരം: വട്ടിയൂർക്കാവ്‌ ഉപതിരഞ്ഞെടുപ്പുമായി ബന്ധപ്പെട്ട്‌ തന്റെ പേരിൽ സമൂഹമാധ്യമങ്ങളിൽ വ്യാജപ്രചാരണം നടക്കുന്നതായി നടൻ അലൻസിയർ. "വട്ടിയൂർക്കാവിൽ ബിജെപി ജയിച്ചാൽ അതിന്‌ ഉത്തരവാദി സിപിഎം ആയിരിക്കും' എന്ന പോസ്‌റ്റാണ്‌ തന്റെ പേരിൽ പ്രചരിക്കുന്നതെന്നും ഇതിനെതിരെ ഡിജിപിക്ക്‌ പരാതി നൽകിയിട്ടുണ്ടെന്നും അദ്ദേഹം വാർത്താസമ്മേളനത്തിൽ പറഞ്ഞു.

ഗൾഫിലുള്ള സുഹൃത്താണ്‌ വാട്‌സാപ്പിൽ പ്രചരിക്കുന്ന സന്ദേശം അയച്ചുതന്നത്‌. പ്രസ്‌താവനയുമായി തനിക്ക്‌ ഒരു ബന്ധവുമില്ല. തന്നെ വ്യക്തിപരമായി അധിക്ഷേപിക്കുന്നതിനാണ്‌ വ്യാജപ്രചാരണം നടത്തുന്നതെന്നും കുറ്റവാളികളെ നിയമത്തിനു മുന്നിൽ കൊണ്ടുവരണമെന്നും അലൻസിയർ ആവശ്യപ്പെട്ടു.