കരൂര്‍ ദുരന്തത്തിന് പിന്നാലെ ഫോണില്‍ ബന്ധപ്പെടാന്‍ ശ്രമിച്ച അമിത് ഷായെ അവഗണിച്ച് വിജയ്; സംസാരിക്കാന്‍ താത്പര്യമില്ലെന്ന് മറുപടി

ചെന്നൈ: കേന്ദ്ര ആഭ്യന്തര മന്ത്രി അമിത് ഷായെ ടിവികെ അധ്യക്ഷന്‍ വിജയ് അവഗണിച്ചതായി റിപോര്‍ട്ട്. കരൂര്‍ ദുരന്തത്തിന് പിന്നാലെ അമിത് ഷാ വിജയ് യെ ബന്ധപ്പെടാന്‍ ശ്രമിച്ചെന്നാണ് റിപോര്‍ട്ട്. ദുരന്തത്തിന്റെ പിറ്റേന്ന് അമിത് ഷായുടെ ഓഫീസ് ബന്ധപ്പെട്ടുവെന്നാണ് വിവരം. എന്നാല്‍ താത്പര്യമില്ലെന്നായിരുന്നു വിജയ് മറുപടി നല്‍കിയത്.

വിജയ്യുടെ അച്ഛന്‍ ചന്ദ്രശേഖറും സിനിമാമേഖലയിലെ ചിലരും വഴിയാണ് ബന്ധപ്പെട്ടത്. ഇരുവരും തമ്മില്‍ ഫോണ്‍ സംഭാഷണത്തിന് വഴിയൊരുക്കാന്‍ ആവശ്യപ്പെട്ടു. ടിവികെയുടെ മുതിര്‍ന്ന നേതാക്കളുമായി ബന്ധപ്പെട്ടു. എന്നാല്‍ അമിത് ഷായോട് സംസാരിക്കാന്‍ താല്പര്യമില്ലെന്ന് വിജയ് പ്രതികരിച്ചു.

അതേസമയം വിജയ് യുടെ അടുത്ത രണ്ടാഴ്ചത്തെ പരിപാടികള്‍ മാറ്റി. ഔദ്യോഗിക അറിയിപ്പുമായി ടിവികെ രംഗത്തെത്തി. അടുത്ത രണ്ടാഴ്ചത്തെ പൊതുയോഗങ്ങള്‍ മാറ്റിയെന്നാണ് ടിവികെ സെക്രട്ടറിയേറ്റിന്റെ അറിയിപ്പ്. തത്കാലത്തേക്കാണ് പരിപാടികള്‍ മാറ്റിവെച്ചിരിക്കുന്നത്. അടുത്ത പൊതുയോഗങ്ങളെ കുറിച്ചുള്ള അറിയിപ്പ് പിന്നീട് നല്‍കുന്നതായിരിക്കും.