70 ലക്ഷം രൂപ പിഴ; കേരളത്തിലേക്കുള്ള സര്‍വീസ് നിര്‍ത്തി തമിഴ്‌നാട് ഒംനി ബസുകള്‍

ചെന്നൈ: കേരളത്തിലേക്ക് ദിവസേന നടത്തിയിരുന്ന സര്‍വീസുകള്‍ നിര്‍ത്തലാക്കി തമിഴ്‌നാട് ഒംനി ബസ് ഉടമസ്ഥരുടെ സംഘടന. കേരളം കനത്ത പിഴ ചുമത്തിയതില്‍ പ്രതിഷേധിച്ചാണ് നടപടി. ശബരിമല തീര്‍ഥാടകരെയടക്കം തീരുമാനം പ്രതികൂലമായി ബാധിക്കും. മണ്ഡല മകരവിളക്ക് സീസണില്‍ തമിഴ്‌നാട്ടില്‍ നിന്ന് നിരവധി പേരാണ് ഒംനി ബസുകളില്‍ കേരളത്തിലേക്കെത്തിയിരുന്നത്. പെര്‍മിറ്റ് ലംഘനത്തിന്റെ പേരില്‍ കേരള ട്രാന്‍സ്‌പോര്‍ട്ട് ഡിപ്പാര്‍ട്‌മെന്റ് 30 ബസുകള്‍ പിടിച്ചെടുത്തുവെന്നും 70 ലക്ഷം രൂപ പിഴ ഈടാക്കിയെന്നും അസോസിയേഷന്‍ ആരോപിക്കുന്നു. ചെന്നൈ, കോയമ്പത്തൂര്‍, മധുര എന്നിവിടങ്ങളില്‍ നിന്നെത്തിയ ബസുകള്‍ക്ക് 2 മുതല്‍ 2.5 ലക്ഷം രൂപ വരെ പിഴയാണ് ചുമത്തിയത്.

ഇതു തങ്ങള്‍ക്കും യാത്രക്കാര്‍ക്കും വലിയ ബുദ്ധിമുട്ടുകള്‍ ഉണ്ടാക്കിയെന്ന് സംഘടനാ പ്രസിഡന്റ് എ. അന്‍പളകന്‍ പറയുന്നു. നവംബര്‍ 7 മുതലാണ് നടപടി സ്വീകരിച്ചിരിക്കുന്നത്. ഇതോടെ 150 ബസുകളുടെ സര്‍വീസും ബുക്കിങ്ങും റദ്ദാക്കിയിരിക്കുകയാണ്. വിഷയത്തില്‍ ഇടപെടണമെന്നും ശാശ്വത പരിഹാരം കാണണെന്നും തമിഴ്‌നാട് സര്‍ക്കാരിനോട് ബസ് ഉടമസ്ഥരുടെ സംഘടന ആവശ്യപ്പെട്ടിട്ടുണ്ട്.