കോടികള്‍ നല്‍കി ബംഗ്ലദേശ് താരത്തെ വാങ്ങി, ഷാറുഖിന് രാജ്യത്ത് തുടരാന്‍ അവകാശമില്ല: രാജ്യദ്രോഹിയെന്ന് ബിജെപി നേതാവ്

മീററ്റ്: ബംഗ്ലദേശ് ക്രിക്കറ്റ് താരം മുസ്തഫിസുര്‍ റഹ്‌മാനെ ഐപിഎല്‍ താരലേലത്തില്‍ വാങ്ങിയതിന്റെ പേരില്‍, കൊല്‍ക്കത്ത നൈറ്റ് റൈഡേഴ്‌സ് ടീം ഉടമയും ബോളിവുഡ് താരവുമായ ഷാറുഖ് ഖാനെതിരെ രൂക്ഷവിമര്‍ശനവുമായി ബിജെപി നേതാവ് സംഗീത് സോം. ഒരു ബംഗ്ലദേശി താരത്തെ വാങ്ങിയ ഷാറുഖ്, രാജ്യദ്രോഹിയാണെന്നും രാജ്യത്തു തുടരാന്‍ ഇനി അവകാശമില്ലെന്നും സംഗീത് സോം പറഞ്ഞു. 9.20 കോടി രൂപയ്ക്കാണ് ഐപിഎല്‍ ലേലത്തില്‍ മുസ്തഫിസുറിനെ കൊല്‍ക്കത്ത നൈറ്റ് റൈഡേഴ്‌സ് സ്വന്തമാക്കിയത്. ഐപിഎലില്‍ ഒരു ബംഗ്ലാദേശ് താരത്തിനു ലഭിക്കുന്ന ഏറ്റവും ഉയര്‍ന്ന തുകയാണിത്.

''ഒരു ഭാഗത്ത് ബംഗ്ലദേശില്‍ ഹിന്ദുക്കളെ കൊല്ലുകയാണ്. മറ്റൊരു ഭാഗത്ത് ബംഗ്ലദേശി താരങ്ങളെ ഐപിഎല്‍ ലേലത്തില്‍ വാങ്ങുന്നു. ഷാറുഖ് ഖാന്‍ ഒന്‍പതു കോടി നല്‍കിയാണ് റഹ്‌മാനെ വാങ്ങിയത്. ഇപ്പോള്‍ ബംഗ്ലദേശില്‍ ഇന്ത്യാ വിരുദ്ധ മുദ്രാവാക്യങ്ങള്‍ ഉയരുകയാണ്. പ്രധാനമന്ത്രിയെ അപമാനിക്കുന്നു. പക്ഷേ ഷാറുഖ് ഖാനെപ്പോലുള്ള രാജ്യദ്രോഹികള്‍ ഒന്‍പതു കോടി മുടക്കി അവരെ സഹായിക്കുന്നു. ഷാറുഖിന് ഇന്ത്യയില്‍ നില്‍ക്കാന്‍ അവകാശമില്ല.''-സംഗീത് സോം മീററ്റില്‍ നടന്ന പൊതുപരിപാടിയില്‍ പറഞ്ഞു.

മുസ്തഫിസുര്‍ റഹ്‌മാനെ ഇന്ത്യയില്‍ കാലുകുത്താന്‍ അനുവദിക്കില്ലെന്നും സംഗീത് സോം ഭീഷണി മുഴക്കി. ഐപിഎല്‍ ലേലത്തില്‍ ബംഗ്ലദേശ് പേസറെ കൊല്‍ക്കത്ത വന്‍ തുക മുടക്കി വാങ്ങിയത് വലിയ വിമര്‍ശനങ്ങള്‍ക്കാണു വഴിയൊരുക്കിയത്. ആത്മീയ നേതാക്കളായ ദേവ് കിഷന്‍ ഠാക്കൂറും സ്വാമി രാംഭദ്രാചാര്യയും ഷാറുഖ് ഖാനെതിരെ പരസ്യമായി രംഗത്തെത്തിയിരുന്നു.

അതേസമയം ഷാറുഖിനെ പിന്തുണച്ച് കോണ്‍ഗ്രസ് എംപി മാണിക്കം ടാഗോര്‍ രംഗത്തെത്തി. ബോളിവുഡ് താരത്തെ രാജ്യദ്രോഹിയെന്നു വിളിച്ചത് ഇന്ത്യയുടെ ബഹുസ്വരതയ്‌ക്കെതിരായ അക്രമമാണെന്ന് കോണ്‍ഗ്രസ് നേതാവ് പ്രതികരിച്ചു. ക്രിക്കറ്റ് ബോര്‍ഡ് താരത്തെ വാങ്ങാന്‍ അനുമതി നല്‍കിയതുകൊണ്ടാണ് ഷാറുഖ് ഖാന് ഏതെങ്കിലും രാജ്യത്തുനിന്ന് താരങ്ങളെ തിരഞ്ഞെടുക്കാന്‍ സാധിക്കുന്നതെന്ന് കോണ്‍ഗ്രസ് നേതാവ് താരിഖ് അന്‍വറും വ്യക്തമാക്കി.