കോണ്‍ഗ്രസുമായി സഖ്യത്തിനു ഇനിയും തയ്യാറെന്ന് അരവിന്ദ് കെജ്‌രിവാള്‍

ന്യൂഡല്‍ഹി: മോദി-അമിത് ഷാ കൂട്ടുകെട്ടില്‍നിന്ന രാജ്യത്തെ രക്ഷിക്കാന്‍ എന്തിനും തയ്യാറാണെന്നും കോണ്‍ഗ്രസുമായി സഖ്യത്തിന് ഇപ്പോഴും തയ്യാറാണെന്നും ആം ആദ്മി പാര്‍ട്ടി അധ്യക്ഷന്‍ അരവിന്ദ് കെജ്‌റിവാള്‍. രാജ്യം ഏറെ അപകടത്തിലാണ്. മോദി-അമിത് ഷാ ഭരണത്തുടര്‍ച്ച ഇല്ലാതാക്കാന്‍ എല്ലാ ശ്രമവും നടത്തുമെന്നും ഡല്‍ഹിയല്‍ നടന്ന പ്രതിപക്ഷ പാര്‍ട്ടികളുടെ യോഗത്തിനു ശേഷം കെജ്‌രിവാള്‍ പറഞ്ഞു. കോണ്‍ഗ്രസ് നേതാക്കളായ കപില്‍ സിബല്‍, അഭിഷേക് സിങ്‌വി തുടങ്ങിയവരുടെ സാന്നിധ്യത്തിലാണു കെജ്‌രിവാളിന്റെ പ്രതികരണം. അതേസമയം, സഖ്യം സംബന്ധിച്ച ചോദ്യത്തില്‍നിന്നു കപില്‍ സിബല്‍ ഒഴിഞ്ഞുമാറി. ഞങ്ങളേക്കാള്‍ അധികം ഇതുസംബന്ധിച്ച് കെജ്‌രിവാളിന് അറിയാമെന്നും അദ്ദേഹത്തോട് തന്നെ ചോദിച്ചോളൂവെന്നുമായിരുന്നു സിബലിന്റെ മറുപടി. കോണ്‍ഗ്രസുമായി സഖ്യത്തിന് എപ്പോഴും തയ്യാറാണെന്ന് ആം ആദ്മി പാര്‍ട്ടി നേതാവും ഡല്‍ഹി ഉപമുഖ്യമന്ത്രിയുമായ മനീഷ് സിസോദിയയും വ്യക്തമാക്കി. എന്നാല്‍, ഡല്‍ഹി മാത്രമായുള്ള സഖ്യത്തിന് തങ്ങള്‍ക്കു താല്‍പര്യമില്ലെന്നും അദ്ദേഹം പറഞ്ഞു.